E archivo opulento di programa di telebishon di Wereldomroep ta kontené sentenares di ora di material di felm. Den un seri spesial nos ta presentá algun programa remarkabel di e Hulanda di antaño.  

Na òktober 1965, Bert Steinkamp i Yvette Ecury ta sigui un grupo di antiano na Hilversum. E kòmbersashonnan ta na hulandes, papiamentu i ingles. A transmití e programa na Antia Hulandes.

Den e di dos transmishon akí ta papia di dibertishon dje antianonan. Bert Steinkamp ta dal un buèltu na pia na Hilversum, turesten ku e ta konta dje siudat. E antianonan ta kore rònt riba bròmer den e lugá, kaminda ántes tabata kria karné.

Den e edifisio di Wereldomroep ta graba algun integrante antiano di un banda musikal. A graba nan den Studio 11 i 12 ('t Pandje, e nogoshi di horeka pegá ku Wereldomroep: awendia tur hende konos'é komo Studio 13).

Mas aleu e antianonan ta pasa wak èrpòrt di Hilversum, pisina bou di dak, weg'i bala serka ekipo Gooische Boys ( kaminda dos di nan ta kompetí) i kared'i kabai na parke di deporte di Hilversum.

Tabatin un resúmen semanal di televishon hulandes, ku kolaborashon di NTS, ku despues lo bira NOS. Tur luna tabata pasa un programa di saludo (groetenprogramma), kaminda antiano i sürnam por a manda kumindamentu pa nan famianan den oksidente (De West), i mustra kon nan ta traha i studia na Hulanda.
 
Despues di independensha di Sürnam, RNTV a kuminsá produsí p’un merkado internashonal tambe te ku 1986, ora k’un reorganisashon drástiko a tuma lugá. For di e aña ei, produkshon di programanan di televishon tabata sporádiko, i e eksperimento Zomer TV a para bira e emisora satélite hulandes BVN, un kolaborashon di Wereldomroep, VRT di Flándes na Bélgika i emisora públiko di Hulanda.
 
Rib’e wèpsait aki lo 'kita stòf' for di e material, sobretodo di e periodo inisial di RNTV. Wak tur e felmnan dje archivo di Wereldomroep.
 
Selekshon i konseho: Martien Sleutjes.