E archivo opulento di programa di telebishon di Wereldomroep ta kontené sentenares di ora di material di felm. Den un seri spesial nos ta presentá algun programa remarkabel di e Hulanda di antaño.  

Na òktober 1965, Bert Steinkamp i Yvette Ecury ta sigui un grupo di antiano na Hilversum. E kòmbersashonnan ta na hulandes, papiamentu i ingles. A transmití e programa na Antia Hulandes.
 
Den e promé parti nan ta bai bishitá Philips Telecommunicatie na Hilversum, kamind’e antianonan ta traha. Philips Telecommunicatie tabata un dunadó di trabou grandi na Hilversum, k’a duna 2500 trahadó empleo durante su apogeo na 1955. Tabata en efekto kontinuashon dje famoso Nederlandsche Seintoestellen Fabriek (NSF) di unda (téknikamente) e emisora públiko ta originá.
 
Presentadó Bert Steinkamp ta yama pidi pa Yvette Ecury for di hal dje edifisio di Wereldomroep, i ta puntr’e si e ta interesá pa kuminsá presentá programanan di televishon. Na final e ta reakshoná ku entusiasmo. Seguidamente Bert i Yvette ta yega Philips Telecommunicatie na Hilversum. Yvette ta sali kana rib’e tereno di negoshi ku trahadónan antiano, i ta kòmbersá brevemente ku nan na papiamentu òf ingles.
 
E presentadónan ta duna un relato di e trabou den fábrika, i ta disfrutá di un kuminda den kantina. Na diferente sekshon dje empresa, e antianonan ta manda saludo pa nan famianan. Den parti 2 lo sigui e antianonan den nan tempu liber, i nos lo mira Hilversum manera e tabata mediados di añanan sesenta.
 

 
RNTV
Banda di programa di radio, Wereldomroep a kuminsá ku produkshon di programa di television tambe na eskala modesto, manera Radio Nederland Televisie (RNTV). Na 1960 a inisiá e programanan di television akí. Nan tabata destiná pa loke e tempu ei ainda tabata teritorionan ultramar – Sürnam i Antia hulandes – i por a transportá nan fásilmente ku e mes avion, ku tabata hiba teipnan di radio tur siman p’e emisora na Bonèiru. 
Tabatin un resúmen semanal di televishon hulandes, ku kolaborashon di NTS, ku despues lo bira NOS. Tur luna tabata pasa un programa di saludo (groetenprogramma), kaminda antiano i sürnam por a manda kumindamentu pa nan famianan den oksidente (De West), i mustra kon nan ta traha i studia na Hulanda.
 
Despues di independensha di Sürnam, RNTV a kuminsá produsí p’un merkado internashonal tambe te ku 1986, ora k’un reorganisashon drástiko a tuma lugá. For di e aña ei, produkshon di programanan di televishon tabata sporádiko, i e eksperimento Zomer TV a para bira e emisora satélite hulandes BVN, un kolaborashon di Wereldomroep, VRT di Flándes na Bélgika i emisora públiko di Hulanda.
 
Rib’e wèpsait aki lo 'kita stòf' for di e material, sobretodo di e periodo inisial di RNTV. Wak tur e felmnan dje archivo di Wereldomroep.
 
Selekshon i konseho: Martien Sleutjes.