‘Afó ku komunismo’ asina a resoná djaluna riba Plaza de la Revolución na Santiago de Cuba, djis promé ku e servisio di misa na aire liber di Papa Benedikto XVI kuminsá. Un hòmber a ranka sali for di públiko anto kore subi podio, gritando su lema, pero efektivonan di seguridat a kit'é for djei mashá lihé mes. Djis un ratu despues el a kome basta sla tambe serka un kolaborador di Krus Kòrá.
Wim Jansen di redakshon latinoamerikanu di Wereldomroep tabata pará presente entre e kreyentenan i a graba imáhen dje insidente riba vidio.
E 200.000 hendenan ku a bini huntu n'e plasa no a apresiá e akshon individual. Algun di nan a skander ‘Cuba! Cuba!’. Durante su predikashi, Papa a hasi un yamamentu na e kreyentenan pa reforsá nan fe i pa lanta un komunidat renová i habrí; un komunidat mió, mas humano i digno.’ Presidente kubano Raul Castro tabata pará den e públiko.
Djárason Papa Benedikto lo dirigí sirbishi di misa na aire liber na Havana tambe, kapital di Cuba. Aya lo e kòmbersá ku presidente Castro. Outoridatnan eklesiástiko ta bisa ku Papa no tin tempu pa deliberá ku disidente na Cuba.
Bookmark/Search this post with:
Email this Video
Printer-friendly version
Post new comment