Nijntje a hasi aña.  E ta reim mitar siglo bieu i rònt mundu e tin miones di atmiradó. A tradusí e aventuranan di Nijntje na bários idioma. Den eksterior Nijntje ta konosí komo Miffy.
 
Dick Bruna, ilustradó i inventor di e konènchi muhé a pintá e promé Nijntje na momento ku su yu hòmber a mira un konènchi ta bula bula den serunan di santu kant'i laman na Noord Holland. For di e tempu ei Nijntje a konkistá kurason di mucha na tur kontinente.
 
Chikitinnan ta rekonosé e storianan tambe. Nijntje tin un ber di peluche, e ta hunga den un parke infantil, e ta pasa dia, òf keda drumi na un otro lugá. Tin biaha kos fèrdrit ta pasa kuné. Ora su wela muri òf ora e tin ku bai hòspital.
 
Simpel
E promé impreshon di e pinturanan di Dick Bruna ta laga bo kere ku nan ta masha simpel. Nijntje tin dos wowo di kralchi, dos orea largu, i su boka tin forma di un krus. Pero e estilo ta artístiko. Na momento di krea Nijntje Bruna a laga artista hulandes Gerrit Rietveld inspir'é. Bruna ta pinta tur ilustrashon ku un pènsel. E mes ta inventá e storianan tambe. E ta wak pa e frasenan rima ku otro. E ta paga masha tinu si e tradukshonnan na e otro idiomanan ta korekto.
 
Na Utrecht Nijntje tin su mes plenchi, estatua i su mes museo. Tambe tin un serie animá na televishon di Nijntje i a produsí tres musical di dje. Grandi i chíkí tin mag di bin selebrá hasimentu di aña di e konènchi famoso.