Grupo di baile Expreshon Kultural ta bèk riba esenario, despues di a sufri un gòlpi duru nuebe luna pasá durante e atentado di dia di Lareina na 2009. Na e okashon ei un miembro di e grupo a pèrdè su bida i algun otro integrante a keda heridá.

Públiko presente a reakshoná entusiasmá riba e promé presentashon ku Expreshon Kultural a duna despues di e tragedia na misa 'De Goede Rede' na Almere e fin di siman aki.

Miembronan di Expreshon Kultural Isora i Oniela a keda gravemente heridá durante e atentado. Te ainda Isora no por kana drechi i despues di e aksidente Oniela a keda den ròlstul. P'e tabata mashá difísil pa wak demas integrantenan di e grupo balia. Isora tin speransa ku un dia e lo por bolbe balia. Pa nan tur dos e promé presentashon di e grupo ta un paso importante den e proseso di rekuperashon.