Segun e abogado Joran no por a kontrolá su emoshonnan mas ora el a mira Flores ta lesa informashon tokante Natalee Holloway riba su lèptòp. Esaki a sosodé despues ku nan a sali hunga poker den kasino. Segun e abogado Joran niun ora so no tabatin e intenshon di mata Stephany Flores.
Ta sospechá Van der Sloot di a asesiná e mucha muhé Flores aña pasa 30 di mei den su kamber di hotèl na Lima. Si wes aseptá e argumentashon di abogado di Joran, Van der Sloot lo por haña tres pa sinku aña di kastigu di prizòn.

Premeditá
Famia di e víktima ta rechasáa e argumentu di Altez i ta bisa ku Flores a wak e informashon tokante Holloway promé ku nan a bai poker den kasino. Segun abogado di famia Flores e asesinato riba Stephanie Flores tabata premeditá, pasobra Van der Sloot a hòrta kos dje mucha muhé tambe. E abogado di famia Flores a bisa anteriormente kaba ku e ta bai pidi 25 te 30 aña di kastigu di prizòn pa Joran van der Sloot.