Reshèrshi hulandes a deskubrí kasi 220.000 potrèt i video ku pornografia infantil riba énternèt. Nan a deskubrí e datonan skondí aki na momentu k´a bai investigá ramifikashonnan internashonal den un sonado kaso di abusu na Amsterdam.

E kaso aki, k´a sali na kla fin di aña pasá, ta drai rònt di Robert M., un hòmber di 27 aña, prosedente di Letonia i ku ta biba na Hulanda fo´i 2004. Robert M. tabata traha na pasa dianan pa mucha na Amsterdam i tambe komo akohida na kas di famia. El a konfesá di a abuzá di mas ku 80 bebi i mucha chikí.

Nan a haña e sitionan skondí via kòmpiuter di Robert M. Tabata interkambiá datonan riba mas ku 20 sitio rònt mundu, entre otro na Merka. FBI ta na altura. Reshèrshinan hulandes a bin topanan ku yen di formanan nobo i chokante di pornografia infantil. E investigashon a dura hopi luna pasobra Robert M. tabata hasi uzo di un ret kaminda bo por ta anónimo riba énternèt.