Djadumingu, 10 di òktober 2010 sekshon karibense di Wereldomroep a dediká atenshon spesial na desmantelashon di Antia i nasementu di un konstelashon estatal nobo den Reino ulandes. E akontesimentu istóriko akí a koinsidí ku e promé entrega di 'Aworaki', un programa nobo di Wereldomroep, tantu na radio komo riba énternèt. Dos dia promé, 8 di òktober a inougurá un wèpsait, ku tambe ta hiba nòmber di Aworaki.

Lokushon di kick-off di e programa tabata na enkargo di Désirée Martis. Pa e okashon ei a transmití 'Aworaki' for di studio di Radio Hoyer, un di e sosionan di Wereldomroep den Karibe.

Kobertura di 10-10-10
Reporteronan Scarlet Windster (na Islariba), Désirée Martis (na Kòrsou), Belkis Osepa (na Boneiru), Favell Maduro (den Staten i na Brionplein), Marlon Reina, Romeo Hoost i Leila Wijnhoven (na Hulanda) a akudí na e diferente partinan di Reino pa kubri e eventonan festivo. 
 
Ademas di un relato di e festividatnan na e islanan i na Hulanda, por skucha e bon deseonan di vários figura prominente (èks) antiano i rubiano i un entrevista di despedida ku e último minister presidènt di Antia, señora Emily de Jongh-Elhage.
 
Na Eindhoven i na Den Haag a selebrá 10-10-10 djun forma alternativo. Na Einhoven a tene un merienda estilo ingles', e asina yamá 'High Tea' i na Den Haag por a bishitá un festival di sine, esta 'Shoot me-filmfestival', kaminda a hinka un programa antiano den otro ku vários pelíkula i dokumentario di orígen karibense.