De Volkskrant ta dediká mashá atenshon awe na e fase desisivo den e proseso di asesinatonan di 8 di desèmber. "Ora di bèrdat a yega pa Bouterse", ta titular den De Volkskrant. Bouterse mes no tin miedu di e kastigu ku e ta bai tende di dje awe, segun abogado Freddie Kruisland. E tin miedu di un kondena. Kruisland i su amigu na Hulanda, Gerard Spong ta bisa ku tin sufisiente prueba kontra Bouterse pa dun'é un kondena di 20 aña o bida largu.
AD i De Telegraaf ta komentá den un komunikado kòrtiku ku e proseso ta sigui. Ounke a aprobá un lei di amnistia. Un funshonario di e tribunal militar a bisa ku e kaso ta keda tratá. Trouw ta presta atenshon na e sankshonnan di Hulanda. Sürnam no ta bou di impreshon di e sankshonnan. Minister Winston Lackin a deklará ku Hulanda mes por keda ku e tiki sèn di desaroyo ei. Den Haag tambe a realisá su mes ku e pais no ta mashá impreshoná, asina por lesa den Trouw. Minister Rosenthal ta spera di haña respaldo di Union Oropeo.
Hulanda a gana entre 63 i 79 mion florin ku komèrsio di katibu. Mas o menos 700 mion di euro. De Volkskrant ta públika notisia di un kalkulashon ku dos históriko a hasi. Karwan Fatah-Black di universidat di Leiden i Matthias van Rossum di Universidat di Amsterdam. E montante ta parse chikí pa un kantidat di 609 mil katibu afrikano ku Hulanda a laga transportá pa kontinente merikano, segun e matutino. Pero ta mas di loke anteriormente a asumí. E benefisio ekonómiko di komèrsio di esklavo tabata menos si kompar'é ku ekonomia di Hulanda entre 1595 i 1829. Pero Van Rossum ta enfatisá ku a wak solamente komèrsio transatalntiko di katibu mientras ku e sistema di benta di katibu tabata mas amplio. No a konta e entradanan di West Indische Compagnie ku tabata drente for di plantashon di kofi i di suku. E sifranan no ta impreshoná Piet Emmer, eksperto di sklabitut. E ta keda para ariba ku komèrsio di katibu tabata un faktor chikí pa loke ta trata properidat hulandes.
Un kuart di dòkternan ta baha kabes pa pashèntnan ku ta intimidánan. Esei ta titular riba portada di De Volkskrant. E matutino a públika e notisia ei a base di un investigashon ku organisashon di trahadónan médiko, esta VvAA a laga hasi. Un tersera parti di dòkternan di kas, fisioterapista i djentista na Hulanda a yega di duna pashèntnan tratamentu inesesario pasombra nan a intimidánan. E organisashon VvAA ta bisa ku intimidashon di trahadó médiko ta kosta kuido di salu miones di euro.
Un kununkero homoseksual ta bai partisipá den e temporada nobo di e programa di televishon di buska partner, esta 'Boer zoekt Vrouw.', asina ta pará den AD. Ta trata di kunukero Willem. E ta biba na region Achterhoek. E kunukero aki no ta unu deskonosí den e mundu di kunukeronan homoseksual. Anteriormente pa ta mas eksakto na 2008, el a partisipá na e 'coming-out day', dia kaminda kunukeronan muhé i hòmber ta deklará kiko nan preferensia seksual ta.
Fakansi grandi lo por kaba tempran pa miles di famia hulandes e aña aki, esta segun De Telegraaf. Mayornan ku tin nan yunan su nòmber skibí den nan pasport no por sali Hulanda ku nan famia. For di 26 di yüni mayornan por sali Hulanda ku nan yunan solamente si nan yunan tin nan mesun pasport.
