Boletin di notisia di 12or di mèrdia

Obispunan hulandes ke investigá abusu seksual
Iglesia Katóliko ta laga hasi un investigashon independiente di abusu seksual na instanshanan katóliko. Esaki obispunan hulandes a disidí. Èks presidente di parlamento lo manehá e komishon di investigashon. E asuntu rònt di abusu den Iglesia Katóliko a kuminsá kore ora ku Wereldomroep i NRC Handelsblad a divulgá ku na un internat na 's Heerenberg na Hulanda, padernan Salesiano a abusá di mucha hòmber. Despues a bini  mas ku shen notisia di abusu aseka. Un pader ku a traha na e internat na 's Heerenberg a atmití ku el a abusá di un mucha hòmber. E pader a pidi despensa na telefòn, i a bisa ku e tin di baha kabes i aseptá e konsekuenshanan.

Rekonteo di voto na Rotterdam
Na Rotterdam ta bolbe konta tur voto di elekshon pa konseho munisipal di siman pasá. Esaki e Komishon di Investigashon di Kredensial a disidí despues di un rekomendashon di alkalde Aboutaleb. Ademas e komishon a disidí ku un órgano independiente mester tin supervishon. Amtenar ku siman pasá no tabatá envolví den e konteo, lo konta e votonan di nobo. Den elekshonnan munisipal PvdA na Rotterdam a haña 650 voto mas ku Leefbaar Rotterdam, ku asina a bira e di dos partido. Marco Pastors di Rotterdam a protestá kontra e resultado, pasobra a konstatá iregularidat seka diferente urna.

PvdA no ke koperashon ku PVV
Sekshon di PvdA na Den Haag no ke koperá ku PVV. No tin base pa un koperashon ku kontenido. Fuera djesei por papia di un 'abismo insuperabel' entre e dos partidonan, segun PvdA . Siman pasá e partidonan a tene un deliberashon i ei PVV a bolbe enfatisá ku entre otro nan ke prohibí lens'i kabes i moské nobo den e siudat. Ta p'esei Van Nieuwenhoven, presidente di frakshon di PvdA lo no invitá PVV pa e siguiente kòmbersashonnan.

Fitna II no promé ku elekshon parlamentario na Hulanda
Kontinuashon di e di dos pelíkula di Geert Wilders di PVV lo no sali promé ku elekshonnan pa parlamento. Aña pasá Wilders a anunsiá un di dos entrega di Fitna. Su intenshon tabata pa sak'é promé ku elekshon, pero komo ku esaki lo tuma lugá un aña delantá, e no ta alkansá. Wilders tabata preparando e pelíkula, pero por lo pronto e no tin tempu pa produsié.

Disidentenan kubano ke pa presidente Lula di Brazil intermediá
Un grupo di disidente kubano a pidi presidente Luis Inacio Lula da Silva di Brazil pa intermediá den e asuntu relashoná ku periodista Guillermo Fariñas. Esaki kasi dos siman pasá a kuminsá un wèlga di hamber pa protestá morto di Orlando Zapata, un disidente ku a fayesé despues di un wèlga di hamber di 85 dia. Ku su akshon Fariñas ke logra libertat di 26 disidente, ku mester di trato médiko. Outoridatnan kubano ta haña e wèlga di hamber di e periodista inaseptabel i ta papia di chantahe. E grupo di disidente ta pidi Lula den un karta, pa usa su influensha grandi den e region pa haña un solushon pa destinu di prezunan polítiko na Cuba. Entretantu Fariñas su situashon ta bayendo atras, pero e ta desididu pa sigui ku su wèlga di hamber te na final.

A mata un terorista prominente na Indonesia
Presidente di Indonesia Susilo Bambang Yudhoyono a konfirmá ku Dulmatin, un di e teroristanan mas buská na e pais, a muri. Ayera polis indones a tira tres sospechado di terorismo mata durante un invashon na Jakarta. Ta sospechá Dulmatin di a hunga un ròl grandi den e atentadonan di bòm na Bali na aña 2002. Estados Unídos a pone un preis di 10 mion dòler riba su kabes. Yudhoyono a konfirmá morto di Dulmatin durante un spich den parlamento di Australia na Canberra. Promé minister di Australia, Kevin Rudd a felisitá Indonesia ku e éksito den e lucha kontra terorismo.

Lei na Myanmar ta impedí elekshon di Aun San Suu Kyi
Hunta na Myanmar a saka un lèi ku definitivamente ta hasi imposibel pa lider di oposishon Aung San Suu Kyi partisipá na elekshonnan. Segun e lèi prezonan no por ta kandidato i asta no por ta miembro di un partido polítiko. Ta fòrsa partido NLD di Suu Kyi pa ekspuls'é; si esaki no sosodé e or'ei ta disolvé e partido. E partido ta deliberá riba un reakshon. No tin fecha pa elekshon ainda; probablemente lo bira òktober òf novèmber i kasi sigur lo terminá e aresto di kas di Suu Kyi despues di esaki.

Sientífiko hulandes lo yuda investigá rapòrt di klima di NU
E sientífiko hulandes Robert Dijkgraaf lo hunga un papel importante den investigashon di e rapòrt kontroversial di pènel di klima di Nashonnan Uní yama IPCC. Dijkgraaf ta ko-presidente di e Interacademy Council, un órgano di konseho di kua akademianan di siensia di hopi pais ta miembro. Mas lat awe Nashonnan Uní lo partisipá ofishalmente ku Interacademy Council lo investigá e manera ku a traha e rapòrt di IPCC. Dijkgraaf a biaha bai New York p'esaki. Último tempu algun fayo den e rapòrt a sali na kla. E investigashon mester ta kla na ougùstùs.

Deporte-futbòl oropeo
Bayern Munchen i Arsenal ta e proménan ku a yega kuarta final den e weganan di Champions League. Esaki ounke ku Bayern a pèrdè di Fiorentina na Italia ku skor di 3 pa 2 , pero debí n'e viktoria di 2 pa 1 anteriormente, e ekipo di Louis van Gaal lo sigui. Arsenal na Londen a kaba ku FC Porto. E Inglesnan a gana 5 pa 0. Promé k'esei Porto a gana nan ku 2 pa 1.

Pronóstiko di tempu
Hopi solo i temperatura máksimo di 6 grado. Mayan ta mas nublá i anochi tin chèns riba poko áwaseru.