WILLEMSTAD – Museo di plaka di Banko Sentral di Kòrsou i Sint Maarten djaweps 3 di mei a lansa su propio website Moneymuseum.cw.

Museo di plaka ta ofresé e bishitante informashon tokante trokeo, kon plaka a originá, historia di plaka na Kòrsou i Sint Maarten i tareanan di Banko Sentral. Ademas tin un eksposishon chikí di arte i un eksposishon di algun hoya di filingrana.

Riba e website nobo por mira diferente moneda i plaka di papel, e museo i e edifisio kaminda e museo ta keda.

Pa alumno di skol i studiante e website ta ofresé diferente artíkulo ku nan por usa pa proyekto di skol òf turno di palabra tokante plaka. Museo di plaka ta keda na Scharlooweg 11. E museo ta habrí di djaluna te djabièrnè te 17:00 or i entrada ta gratis.