WILLEMSTAD - Djamars anochi, alrededor di kuartu pa 10, Sentral di Polis a dirigí un patruya na Pampanostraat pa un kaso di tiramentu. Na yegada di polis a bin topa ku un hòmber drumi riba un skuter ku no tabata duna señal di bida mas.

Ne sitio Polis a konstatá ku e víktima tin un kantidat di perforashon di bala na altura di su lomba. Aparentemente un vehíkulo a pasa i for di un arma outomátiko a los diferente tiru. E viktima a keda indentifiká komo, Rochean Franklin Santiago Romano, nasé na Kòrsou, riba 1 di mei 1983.

Riba òrdu di Fiskal di Ministerio Públiko a konfiská e kurpa sin bida di e víktima pa mas investigashon. Tambe a konfiská un kantidat di hùls na e sitio. Departamentu di Reshèrshi ta kontinuá ku e investigashon.

Polis ta súplika tur persona ku por tin kualke informashon riba e kaso aki, pa suministrá esaki na Polis atrabes di e number di telefon 866-6221 òf 911 durante di 24 ora. Tambe por yama e number anónimo 108 na unda bo anonimidat ta garantisá.