WILLEMSTAD – Aña di skol ta kuminsá bon pa mucha hòmber di skol básiko ku gusta hunga futbòl. Curaçao Soccer Academy (CSA) for di sèptèmber ta start ku e plan di futbòl: tur djadumingu ta organisá un torneo di futbòl na dos lokashon riba e isla pa mucha hòmber ku no ta den un klup di futbòl ainda.

Mucha ku ke partisipá mester inskribí den un tim via nan skol. Kada tim ta partisipá ocho djadumingu meinta na e torneo. Den e weganan ta hunga sinku kontra sinku pa duna tur partisipante un chèns di mustra kiko e por.

Coachnan di CSA ta guia e plan di futbòl i tin transpòrt reglá di skol pa e diferente lokashonnan di futbòl. Ademas partisipashon ta gratis.

Desaroyo di deporte
Ku e proyekto CSA ta spera di entusiamá hungadó di futbòl hóben asina tantu ku nan ta apliká seka un klup di futbòl. Asina akademia di futbòl ke kontribuí na desaroyo deportivo di hoben.

Talento
CSA ta un koperashon di Fundashon Bon Intenshon i FFK i ta duna talento chikí di futbòl na Kòrsou un chèns di desaroyá bira deportista kumbre. Aktualmente tin tres grupo di diesocho mucha ta partisipá na e programa di desaroyo di talento. E gruponan ta train tres be pa siman despues di skol.