PHILIPSBURG – Sint Maarten ta apelá na su siudadanonan pa prepará bon pa e temporada di orkan binidero, ku ofishalmente ta kuminsá aki tres dia. Kordinadó di desaster i hefe di brantwer riba e isla, Winston Salomon, a hasi un apelashon tokante esaki den media lokal.

Promé ku komienso di e temporada di orkan ya kaba dos tempestat tropikal a anunsiá nan mes kaba den área karibense: Alberto i Beryl. E último a yega tera na Florida djaluna i a trese hopi áwaseru i velosidat di bientu te na kasi forsa di orkan.

Despues a klasifiká Beryl komo un depreshon tropikal, pero e ora ei ya kaba el a trese áwaseru pisa i fayo di koriente. 23 mil kas di famia tabata sin koriente na Florida i Georgia.
E tim di orkan di Colorado State University bou di mando di Phil Klotzbach i William Grey den kuminsamentu di aprel a pronostiká un temporada di orkan probablemente ménos pisá, ku dies tempestat ku lo haña nòmber, kuater di nan lo por desaroyá pa forsa di orkan. Dos tempestat lo krese bira orkan grandi.

Un temporada promedio di orkan ta trese diesdos tempestat, seis ku forsa di orkan i tres orkan grandi. E lista di orkan pa e aña aki tin e siguiente otro nòmbernan: Chris, Debby, Ernesto, Florence, Gordon, Helene, Isaac, Joyce, Kirk, Leslie, Michael, Nadine, Oscar, Patty, Rafael, Sandy, Tony, Valerie i William .

E temporada di orkan ta kore te 30 di novèmber.