HILVERSUM - NTR, emisora edukativo i kultural na Hulanda lo presentá un seri di dokumentario tokante Sint Eustatius, na okashon di promé aniversario di konstelashon estatal nobo di Reino ulandes. Den e dokumental akí lo fokes riba kiko habitantenan di Statia ta pensa di gobernashon ulandes despues di un aña.

For di 10 di òktober 2010, Sint Eustatius a bira munisipio ekstraordinario di Hulanda, òf manera ta yam'é ofisialmente: un entidat públiko, meskos ku Boneiru i Saba. Den e seri, NTR ta averiguá si pueblo di Statia ta kontentu ku regla i leinan ulandes.
 
Loke a inspirá e emisora pa skohe Statia ta e echo, ku ta e úniko isla ku a opta den e referèndem enkuanto futuro di Reino, pa konservá Antia ulandes. Entretantu ta keha mashá dje statùs nobo i su konsekuenshanan: oumento di preis, belasten nobo i idioma ulandes mandatorio na skol.
 
Algun habitante tin e sensashon ku atrobe ta kolonisando nan isla. Den un komunikado di prensa, Zwaanproducties, produsente dje seri ta sita un isleño ku ta atvertí pa rebeldia violento kontra e hulandesnan na Statia: "Hulanda ta violá derechi humano. A shangriná hende. Lo no strañámi si kuminsá atraká hulandes komo muestra di rebeldia.”
 
Entrante 10 di sèptèmber lo transmití e seri di dokumentario tur djasabra atardi na Hulanda. Kada siman tin un tema sentral: enseñansa, polítika, polis, asistensia i integrashon.