WILLEMSTAD - E kompania di limpiesa di gobièrnu di Kòrsou, Selikor NV, ta remplasá kònteiner pa depositá glas na diferente pòmp di gasolin pa un modèl nobo.

A remplasá e kònteinernan aktual pa kònteinernan di mil liter di plèstik ku un buraku riba e tapa. Esaki pa fasilitá e manera kon usuarionan ta depositá e bòternan den e kònteiner.

E sitionan ku aktualmente tin e kònteinernan di glas ta na e pòmpnan di gasolin na: Juan Domingo, Hanenberg, Tera Kòrá, Buena Vista, Palu Blanku, Brievengat, Mari Pampoen, Gasora i Colon.

Segun Selikor ta e intenshon pa amplia e lokalidatnan aki kaminda stratégikamente públiko lo por depositá bòter di glas den e kònteinernan aki ku e fin pa resiklahe.