PHILIPSBURG – Sint Maarten tin un gobièrnu nobo. Atrobe ku Sarah Wescot-Williams na kabes; e ta keda promé minister. Lo remplasá e kuater ministernan di United Peoples Party (UP) di e gobièrnu ku a kai djasabra 28 di aprel. E gabinete nobo ta kaba e término te na elekshon di 2014.

Den e gobièrnu nobo National Alliance ta haña e puestonan di VROMI (i vise promé minister), Finansa (ta menta nòmber di Roland Tuitt) i Enseñansa. Tambe e partido lo perkurá pa e minister plenipotensiario suplente na Den Haag i pa presidente di Staten. Pa lo demas poko kos lo kambia den e gobièrnu nobo.

E koalishon di UP, DP i e miembro di parlamento Patrick Illidge tabatin 9 asiento den Staten. E koalishon nobo tin un asiento mas pasobra DP djaluna a disidí na delaster momento pa djòin. Awor National Alliance ku sinku asiento ta e partido di mas grandi. DP tin dos asiento, i e miembronan di Staten independiente Romain Laville (ku a sali for di UP), Patrick Illidge i Frans Richardson ta sostené gobièrnu.

Ora UP di vise promé minister Theo Heyliger djasabra a anunsiá ku nan ta sali for di koalishon ainda tabata mustra manera un gobièrnu nobo lo no tin mas ku 8 asiento den Staten. Un base smal den un parlamento di 15 asiento. A evitá elekshon nobo ora DP a disidí di sigui ku e koalishon nobo. UP tabata e partido di mas grandi ku seis asiento, pero despues ku Laville a sali a keda ku 5 asiento komo úniko den oposishon.