Resúmen di media, 30 di yüli

'Dia desisivo pa gabinete derechista', De Telegraaf ta titulá. Segun e korant kos ta mustra positivo, pero Rutte, Wilders i Verhagen awe numa lo saka nan konklushonnan. Segun De Volkskrant pa promé be despues di Segundo Guera Mundial Hulanda ta na kaminda pa un gabinete di minoria.

Ta mustra manera e lider di PVV, Geert Wilders lo keda pafó di un gabinete, pero e lo sostené e gobiernu derechista di minoria si. Táktikamente esaki ta un akshon prudente, esta segun De Volkskrant. E korant ta usa Dinamarka komo ehèmpel. Einan e partido hermana di PVV ya tin nuebe aña ta tolerá un gabinete di minoria. 'Sin responsabilidat pa fayonan di gobièrnu pero ku hopi influensha si', segun De Volkskrant.

Dagblad De Pers ta skibi ku e diferente diputadonan islamita
den CDA ta haña ku un koperashon di gobièrnu ku PVV no por. Awe frakshon di CDA ta reuní, meskos ku e otro dos partidonan, tokante di e partisipashon na gobièrnu.

Diferente media ta skibi ku FBI ta bai investigá e 90 mil dokumento tokante guera na Afganistan ku a lèk. Washington Post a papia ku e fundadó di Wikileaks. Den un sine riba e website di e korant e fundadó ta kontestá pregunta di lesadó tokante e dokumentonan sekreto ku e site a publiká.

Èks minister Jan Pronk no tin masha kos bon di bisa di e aktitut internashonal na Afganistan. E ta bisa den Nederlands Dagblad ku e militarnan hulandes a hasi un trabou ekselente na Uruzgan. En kambio, polítika hulandes, inkluso su mes PvdA, a faya. 'Kuater aña di presensia hulandes tabata pòrnada', e ta konta Nederlands Dagblad. E ta desapuntá. 'Hulandesnan no a logra di duna nan atversario un man. Ta esei mester a sosodé'.

De Telegraaf i De Volkskrant tin e relato di hobennan marokano ku ta chantaheá hòmber homoseksual den regio di Bergen op Zoom. E malhechornan, ku tin mas o menos 16 aña di edat tabata siña konosé nan víktimanan via un website i asina tabata traha sita ku nan. Durante di e sita otro hoben tabata bini i chantaheá i menasá nan víktimanan. Tin be e víktimanan a paga te asta mil euro. Entretantu polis a detené e malhechornan i ta hasi un yamada na tur otro víktima pa duna keho.

De Telegraaf ta skibi ku e almasen Hema ta hasi propaganda online pa artíkulo nobo pa ora skol habri riba un site speshal pa 'spik', esta kon pa kometé froude durante di tèst i èksamen. Riba e website tur hende por pone tep kon pa spik. Ta rekompensá kada tep ku un 'pèn pa spik', un pen ku su enk por lesa solamente si usa un lampi ku lus ultraviolèt. E bònt general di enseñansa den un reakshon a apelá na tur maestro i maestra pa lesa bon tur 18 mil tep pa spik.

Na Eibergen un labadó di bentana di glas di parti pafó a salba un hòmber di 64 aña for di su kas ku tabata na kandela. Djaweps merdia e homber tabata seka di bula for di bentana di promé piso di su kas ku tabata na kandela. Dos habitante di e bario a mira e hòmber i a yama e labadó di bentana pa bin yuda. E labado di bentana no a pèrdè pa gana i a kue su trapi pa bai salba e hòmber for di e kas. E víktima a sufri leshon leve di e kandela, pero no tabatin nodi di hib'é hòspital. Tur esaki riba website di RTV Oost.