Resúmen di korant

Tiki tiki informashon tokante formashon di gobièrnu hulandes ta sali. De Volkskrant ta skibi ku e resistensha di CDA kontra koperashon ku Geert Wilders ta birando menos. AD ta titulá: Gabinete derechista ta na bista. De Telegraaf ta skibi ku ta e forma di e gabinete ta e punto di kontroversía mas grandi. VVD lo ta preferá un gabinete di mayoria di VVD, PVV i CDA. CDA i PVV mes parse ta preferá un gabinete di VVD i CDA, ku sosten di toleransha di PVV.

Segun De Telegraaf ta reina preokupashon ku salú di informadó Lubbers. E korant ta skibi riba promé página ku Pasku di Rèsurèkshon e eks promé minister a haña un atake di kurason. Ounke ku a disidí di tene e kos ketu, Lubbers su prekursor Tjeenk Willink lo tabata na altura. Segun De Telegraaf su kondishon médiko ta splika pakiko Lubbers a reda su kombersashonnan ku Rèina Beatris.

Despues di ta enemigu 18 aña largu e presidente aktual i e futuro presidente di Sürnam, Ronald Venetiaan i èks lider di ehérsito Desi Bouterse a papia ku otro pa promé be ayera djárason. Riba su promé página De Volkskrant ta pone un potrèt ku ta papia pa su mes di nan dos dunando otro man.

Mas aléu e korant ta skibi ku Hulanda no ta un prioridat pa Sürnam. Asina hefe di gabinete di Sürnam Winston Lackin ta bisa. E mensahe ta skèrpi skèrpi pero bon kla tambe: "Polítika na Den Haag por pensa kiko na ke di Desi Delano Bouterse, pero frankamente bisá ki dònder nos tin kunes. Mundu ta muchu mas grandi ku Hulanda so, i pa yega China bo no tin mester di Schiphol."

Lackin ta sigui: Si plaka pa sosten di desaroyo di Hulanda a kaba, nos ta mira esaki komo un bon kos. E no a trese desaroyo pa nos, el a bira un sosten di dependensha. Esaki lo obligá nos Yu di Sürnam pa pone man na obra.

AD ta skibi ku e presidente franses Sarkozy ke reforsá lasonan ku Bouterse. Sarkozy a skibi Bouterse, ku su pais ta habri pa un koperashon mas intensivo. Sarkozy ta kabes di estado di Guiana franses tambe, ku ta pegá ku Sürnam.

Van Baalen di VVD ke pa paisnan oropeo tene Bouterse afó, asina Trouw ta skibi. "No duna Bouterse visa", van Baalen a bisa Wereldomroep djárason. E miembro di VVD ta duda ku tur pais lo sigui su yamada. "Presidente Sarkozy a asta duna Bouterse pabien", van Baalen a bisa.

Dia pa dia por mira Fidel Castro mas i mas be, De Volkskrant ta titulá. Ta mira e visibilidat repentino di e èks lider kubano komo menasa pa e reformashonnan aktual di su ruman hòmber Raúl. Despues di rekuperá di su enfermedat kuater aña largu den anonimidat, Castro di 83 aña di edat a aparesé den públiko shete be e luna aki. Na Cuba tin hopi spekulashon riba nifikashon di Castro su regreso na un momento, kaminda Raúl di 79 aña di edat a kuminsá libra e prezonan polítiko.

Un aviso polítiko for di Afganistan: si ta dependé di Taliban, PvdA ta drenta gabinete nobo. Un bosero di e ekstrimistanan a duna un entrevista den De Volkskrant. E ta felisitá Hulanda ku retiro di e militarnan stashoná na Afganistan.

PvdA a tuma un di e desishonnan mas importante di tur tempu", bosero Ahmadi ta bisa. Ta p'esei Taliban ta spera ku PvdA lo bai hunga un papel klave den un gabinete nobo kaminda lo tin "un polítika nobo i agradabel" pa Afganistan.