Resúmen di korant

De Telegraaf kièr sa ku un apertura den e kòmbersashonnan orientativo pa formashon djun gabinete ulandes ta aserkando. E kòmbersashonnan orientativo akí entre partidonan VVD, PVV i CDA ta kanando positivamente, segun e matutino. Ekspektativa ta ku si e deliberashon riba finansa bai bon awé, anto e or'ei otro siman por kuminsá ku e negosiashonnan mes-mes tokante un gabinete derechista ku'n koalishon di VVD, PVV i CDA.

De Volkskrant ta informá ku Maxime Verhagen, dirigente di frakshon di CDA ta sigui papia seriamente djun gabinete derechista huntu ku VVD i PVV. Awe ta e di tres dia dje deliberashon. For di e yamadanan telefóniko por dedusí ku ta papiando dje kontenido tambe, segun De Volkskrant

Un primisia pa presidente franses Nicolas Sarkozy: e ta e promé gobernante oropeo ku ta duna pabien na Desi Bouterse ku su elekshon komo presidente di Sürnam, asina De Volkskrant ta skibi. E felisitashon ta poko pika, i no ta tur kaminda lo e kai den bon tera tampoko. Hulanda por ehèmpel ta ninga di bisa Bouterse pabien, ya ku ainda e tin ku sinta un kastigu di 11 aña den prizòn en konekshon ku narkotráfiko. Minister Verhagen di Asuntunan di Eksterior no ke reakshoná riba felisitashon di Sarkozy. Fuera djesei tin un orden internashonal di detenshon di Bouterse, ku kétubai ta vigente. Pero segun De Volkskrant, di tur manera Bouterse lo bai Asamblea General di Nashonnan Uní na New York na luna di sèptèmber próksimo. No por arest'é, ya ku e ta gosa di imunidat diplomátiko den su kalidat di presidente.

Mas aleu den De Volkskrant por lesa e siguiente titular: "Ta deseá intervenshon di Hulanda'. Abogado Gerard Spong ta argumentá, ku deber konstitushonal di gobièrnu ulandes ta pa promové orden hudishal internashonal. Spong ta puntra su mes ki konsekuensha ta bai tin pa Hulanda, awor ku a elegí Bouterse di forma inkonstitushonal komo presidente di Sürnam. Konstitushon sürnam ta dikta ku un kandidato presidenshal no mag di a kometé aktonan ku ta pugna ku Konstitushon. Un ehèmpel: debí na su gòlpi militar di estado na 1982, Bouterse no ta kumpli ku e eksigensha ei. Na Sürnam tambe ta rekonosé e kos akí. E temor pa hasi pregunta di prinsipio na hues ta birando mas grandi na Sürnam, asina abogado Spong a skibi den De Volkskrant.

"Bon Futuro ta pone hende su kara na bèrgwensa", ta titular ku por lesa den Trouw. Porfin Hulanda ke buta òrdu den e prizòn na Kòrsou. Un nòmber nobo, un sak'i plaka, un porvenir nobo, asina e korant ta skibi. Na 2001 a batisá Koraal Specht ku'n nòmber nobo, o sea Bon Futuro. A drecha e edifisio, kos ku a kosta 50 mion. "Esaki lo bira un prizòn modelo den Karibe", asina un kolaborador a bisa. Nuebe aña a pasa anto kétubai e situashon ta problemátiko. "Fièrnu di Reinu" kisas ta zona poko eksagerá, pero te ainda no a yeg'un fin na kontrabanda di droga, poseshon di arma ni violensha. Hulanda ta opservá e abusunan akí hororisá i ku bèrgwensa. Prinsipio dje aña akí sekretario di estado demisionario, Ank Bijleveld di Relashonnan di Reinu a manda personal hulandes pa pone òrdu porfin, segun Trouw.

Trouw ta sigui informá ku e forma ku ta atendé ku hóbennan antiano na Hulanda no ta yuda. Intentonan pa redusí faltament'i skol, desempleo i kriminalidat no a surti mashá efekto último añanan. Kétubai e mucha yònnan antiano ta destaká riba e terenu akí, kompará ku otro hóbennan na Hulanda. Esaki a resultá den investigashon di proyektonan entre 2005 i 2008 na e asina yamá 'Antillianengemeenten', munisipionan na Hulanda kaminda hopi Antiano ta biba.