Resumen di korant ulandes, 27 di yüli

Union Oropeo ta hasi sankshonnan kontra Iran mas pisá, asina Trouw ta skibi. Esaki ta nesesario pasobra Iran no ta masha impreshoná ku e sankshonnan mas suave, e korant ta pone. Ku e sankshonnan nobo, komersio ku Iran lo bira mas difísil. Union Oropeo ta haña ku mester bini mas klaridat tokante e programa nuklear di Iran. Di e manera aki UO ta trata di fòrsa Iran di bini bèk na mesa di deliberashon. Te awo sankshon di por ehèmpel Merka no tabatin efekto riba e maneho iranes.

Nan ta bisa nunka bo no ta muchu bieu pa siña. Pero esaki no ta konta pa algun studiante. Nan kera inskribí na un MBO pero a rechasá nan pasobra nan tabata muchu bieu. A drenta un binti keho na JOB, un organisashon di hoben den enseñansa di fishi. Asina Nederlands Dagblad ta skibi. Segun lei ta prohibí pa rechasa un hende pa un tipo di enseñansa pa motibu di edat. Awo JOB a pone un karta di ehèmpel riba su website pa studiantenan, pa nan mand'é pa e skol di MBO ku a rechasá nan.

E organisashonnan di homoseksual COC Nederland i Gaykrant ke drenta un kombersashon ku iglesia katóliko na nivel nashonal, asina Nederlands Dagblad ta skibi. Nan ta haña ku e tópiko di homoseksualidat mester por papia di dje den mas tantu parokia posibel, riba nivel pastoral. E asuntu a kuminsá mas promé e aña aki ora un pastor a ninga di parti hòsti na un prens di karnaval homoseksual.

Pa motibu di falta di trahadó na polis, polisnan ta hañanan forsá di usa nan arma mas lihé. Asina Henk Joore di bònt di polis ANVP ta bisa den Metro. "Violensha ta birando mas pió", Joore ta bisa. "Hende ta tira man mas lihe kue un glas, un bòter òf un otro arma." Awo ku tin menos hende pa traha e polisnan ku bai atende un kaso no ta sinti ku nan tin sufisiente sosten.

Hopi hulandes ta sinti nan mes felis. Esaki segun De Telegraaf a sali for di un sondeo di opinion di Gallup World Poll. Eiden 68 porshento di e hulandesnan ku nan a puntra ta indiká ku nan ta sinti nan mes felis. Ku esaki Hulanda ta na lugá number kuater di un lista di 155 pais, ku na kabes Dinamarka, siguí pa Finlandia i Noruega.

E publikashon di sigur 92 mil raport di informashon tokante Afganistan riba e website Wikileaks ta preokupá media den interior i den eksterior.

Diario di un kaminda di krus, de Volkskrant ta titulá. Segun e korant e dokumentonan ta pinta un guera di segunda kategoria ku ta frustra di tur banda. Nan ta duna un imagen brutu di e guera, un imagen hopi mas fuerte ku e vershonnan ofishal.

Entretantu Pentagon a kuminsá buska e redadó. E búskeda lo no ta fasil. Segun De Pers WikiLeaks ta traha riba e mesun manera sekreto ku CIA pa protehá redadó. Nan komunikashon interno ta via chat i segun un kode. Pa sòru pa servisionan di informashon no por kita nada for di e website nan tin binti server i sentenares di nòmber rònt mundu.
Si nan haña e redadó misterioso segun de Pers esaki por konta ku un kastigu ku no ta wega. Dia 26 di mei a arestá e analista di informashon merikano di 22 aña di edat Bradley Manning, despues ku el a atmití di a duna e asina yamá vidio di Collateral Damage na WikiLeaks. Riba e vidio aki por a mira kon for di un helikòpter di ehérsito merikano tabata tira siudadano i periodista di Reuters mata na Bagdad.

Laura por of Laura no por? Esaki nrc.next ta puntra su mes. E mucha muhé nabegadó di barku di bela awe den korte na Middelburg lo tende si e ta keda bou di vigilansha di instanshanan òf nò. Segun nrc.next e dilèmanan den e kaso di Laura ta klásiko. Asina libertat di edukashon ta bira un diskushon i tambe e posishon di mayor i yu, i di siudadano i gobièrnu. Pero tambe e pregunta ku nos ta biba den un komunidat di kuido of di riesgo. Segun nrc.next e sentensia ta toka nos tur.