Resúmen di korant

Matutinonan djawe tin hopi atenshon pa e drama di Love Parade ku a tuma lugá na Duisburg. Den Trouw, testigu Guido de Jong ta konta ku hopi hende a fayesé ora nan a kai for di trapi i stèlazje. "E hendenan a kai riba nan kabes i nan a keda mané lusafè kibrá", De Jong ta bisa den Trouw.

Tambe den De Telegraaf i De Volkskrant un relato konmovedor di testigu hóben ku tabata presente na Duisburg. Anouk Smit, hóben di 20 aña, ta konta den De Volkskrant ku e tabata pará 4 meter for di e konosido trapi. Tabata pusha, grita i hopi hende a kai flou. 'Mi tabata den pániko i mi a grita mi amiga bis'é ku nos tin ku hala kita. El a grita bèk bisámi ku e no por bai niun kaminda, nos no por a move mes'. Smit ta konta mas aleu den e matutino ku dado momento el a kai flou. Pero e tabata pará asina pèrtá mei mei di otro hende, ku e no a kai abou. 'Esei ta loke a salbámi', asina e ta konta den De Volkskrant.

Den De Telegraaf ta pará ku na Aruba ta trahando sekretamente riba un pelíkula tokante Joran van der Sloot. Direktor di sine Paul Ruven a skibi un senario huntu ku Marian Batavier pa e pelíkula ku lo yama 'Me and Mr. Jones'. Resultado ta un historia fiktisio tokante un reportero sekreto ku ta bai buska e mucha muhé merikano Nathalee Holloway despues di 5 aña ku el a disparsé. Kuminsamentu di aña 2011 lo estrená e pelíkula.

E leyenda di Rock, Mick Jagger, a hasi 67 aña awe. Den AD ta pará ku na Gran Bretania tin rumor ta kore ku aki dos aña e banda Rolling Stones lo stòp di eksistí. Jagger a reakshoná un tiki fadá. El a bisa ku lo bai bin un gira nobo. Pero ku e no sa si e lo bira un gira di despedida, asina por lesa den AD.

Kon bida diario tabata na 2010? Aki mei aña nos lo haña sa, ora e pelíkula 'Life in a Day' sali. Miles di sineasta amatùr ta hunga un ròl prinsipal. Nan tur a kontestá e yamada di You-Tube pa filma nan interes personal. Por lesa relato den AD di Gerda Haanraads ku a filma su kasá durante un aktuashon.

Den De Volkskrant por lesa historia pika di pastornan homoseksual i nan nochi amoroso na Roma. Ora papa ta bòltu den su kama, pastornan ta fiesta mardugá den seno di homoseksual. E revista italiano Panorama a gaña 3 religioso ku un homo fiktisio i a filma nan ku un kámara skondí.

Hopi atenshon den korant pa despedida di futbolista di Feyenoord, Giovanni van Bronkhorst. E hungadó di bala eksitoso a tuma despedida depsues di un bunita karera kaminda el a kompetí 17 temporada pa Feyenoord, RKC, Glasgow Rangers, Arsenal i FC Barcelona. Durante un partido amistoso ku a tuma lugá den stadion De Kuip, djis un minüt promé ku háftaim ta'tin relevo. Su yu hòmber a tene e bòrchi ku number 8 riba dje. Van Bronckhorst su number kustumbrá. 'Feyenoord ta elogiá su héroe', ta titular di De Volkskrant.