Resúmen di korant ulandes, 24 di yüli

Hopi notisia di formashon di gobièrnu hulandes na Hulanda i situashon na Sürnam relashoná ku elekshon di Desi Bouterse komo presidente.
Riba e potret riba promé página di De Telegraaf por mira e lidernan di VVD i CDA Rutte i Verhagen ta kombersá animádamente. Ta un koalishon nobo nan ta trahando? Awe frakshon di CDA ta disidí ku Verhagen por negoshá un koalishon derechista.

AD ta titulá: Awo si Verhagen mester papia ku Rutte i Wilders. Informadó Lubbers a duna e partidonan derechista orden pa investigá si nan por forma un gabinete. VVD i CDA ke papia. Lider di CDA Verhagen ta preferá un gabinete di sentro, huntu ku VVD i PvdA. Ta PvdA mester kita e blokeo pa un koalishon asina. 'Ta masha iresponsabel ku PvdA den e tempunan difísil aki ta hui pa su responsabilidatnan', asina Verhagen ta bisa den AD.

De Volkskrant ta skibi ku si CDA bai di akuerdo, awe VVD, PVV i CDA lo drenta deliberashonnan mas lihé posibel pa papia tokante un gabinete nobo. Informadó Lubbers djabièrnè a establesé ku no por papia di formashon di otro gabinete di mayoria promé ku a investigá e koperashon polítiko di e derechistanan.

De Telegraaf ta skibi ku a yama hulandes komo testigu na Sürnam. Korte militar di Sürnam djabièrnè a duna abogado di e sospechado prinsipal Desi Bouterse pèrmit pa tende hulandes prominente komo testigu den e proseso rònt di e asesinatonan di desèmber na aña 1982. Abogado Kanhai ke tende entre otro e èks embahador di Hulanda den e tempu ei, Max Vegelin van Claerbergen i e èks agregado militar Hans Valk. Na 1980 Valk a yuda Bouterse bini na mando, segun De Telegraaf.

De Volkskrant ta publiká un opinion di e eskritor i trahadó di opinion Kees Paling i ta titulá ku Bouterse lo usa su poder pa reforsá lasonan ku e presidente venezolano Chavez. Ku su nombramentu komo presidente porfin Sürnam ta haña e estilo suramerikano ku e meresé. Naturalmente ya pa hopi tempu tabatin korupshon, faboritismo i kriminalidat relatá ku droga, pero semper e pais tabatin un estilo amabel i kariñoso. E delaster aki si awor a kaba pa semper.
Ora un èks kometedo di gòlpi di estado, un èks lider di rebelde i un polítiko ku gusta wega di man, kendenan un tempu tabata otro su enemigu mortal, awor sera kabes pa evitá ku un di nan, esun ku ta bai bira presidente, bai será, esaki ta un método típiko Latino Merikano, pa deshasí di un problema chikí. No keda straño si Bouterse lastra Hulanda hink'é den un guera, via Antia i e pais bisiña Venezuela. Tur esaki den De Volkskrant.

AD ta skibi ku komo presidente Desi Bouterse por tófer ku pasado i rekonstruyé. Su soño di añanan largu lo sali. E kometedó di gòlpi di estado i trafikadó di droga kondená ke bira tata di patria. Bou di lagrima el a fiesta ku e multitut di fanátiko riba Plasa di Independensia na Paramaribo, AD ta skibi. Segun e korant Bouterse ta mira e elekshon komo korona riba su bida.

Un aventura kompletamente distinto den De Telegraaf. Despues di merikanonan i rusonan awo ta Korsou ta basha su mes riba biahamentu den espasio. Ayera a firma un akuerdo úniko pa konstrui e vershon antiano espektakular di Cape Kennedy. E meta ta pa kuminsamentu di aña 2014 for di aeropuerto Hato kuminsá hasi e promé buelonan komersial den espasio ku un avion di rakèt supersóniko, ku den algun minüt por bula bai shen kilometer den laira. Ku esaki gobièrnu di e isla ku pronto lo ta independiente, ta brasa un idea futuristiko hulandes di e Space Experience Curaçao, ku tin plannan grandi segun De Telegraaf.

Mesun Telegraaf ta skibi ku BP ta lucha ku molester nobo den seramentu di e pos di zeta den Golfo di Mehiko. E tempestat tropikal Bonnie ta kohiendo rumbo di e pos. Tanten, wardando Bonnie, ku ayera a baha di tempestat tropikal bira depreshon tropikal, a evakuá desenas di barku i plataforma di bora. E kapa riba e pos dañá ta keda na su lugá. BP ta ferwagt ku e asuntu lo trese un mínimó di dies dia di retraso pa por sera e buraku definitívamente.