Resúmen di korant ulandes, 23 di yüli

De Telegraaf sa sigur: Lareina ta influenshá e proseso di formashon. E korant ta sita informadó Lubbers. Segun e korant esaki a reda ayera kiko el a palabrá ku Lareina, loke tradishonalmente mirá no ta bon moda. Lubbers a bisa ku Beatris di ku ainda e ora no a yega pa instalá e lider di VVD Mark Rutte komo formadó. "Lareina su konklushon tabata: Esaki ta un empresa riská ku mi no ke promové, tin tempu pesei ainda", segun Lubbers. Segun e korant e palabranan aki ta mustra ku Lareina tin influensha grandi riba formashon di un gabinete nobo.

Otro korant ulandes naturalmente tambe a reportá tokante e proseso di formashon.

Riba un potrèt riba prome página di Financieel Dagblad Ruud Lubbers ta risibí lider di PVV Geert Wilders. Ku un gesto di invitashon Lubbers ta mustra ku Wilders ta bonbiní i ku kombersashonnan tokante un koalishon derechista por kuminsá. Wilders ku un sonrisa chikí ta para wak e kos un poko strañá. Normalmente Lubbers no sa ta asina amabel kontra PVV.

Remarke tokante Bouterse ta kousa komoshon, nos por lesa den Trouw. E diputado di PvdA na Den Haag Rabin Baldewsingh ta hañando krítika pisá pa su komentarionan relativá tokante Bouterse mas promé den e siman aki den Trouw. Rat munisipal ta eksihí pa e distanshá su mes di e kosnan ku el a bisa. El a bisa entre otro ku "den e temporada promé ku e asesinatonan di desèmber Bouterse a hasi kos masha progresivo".

Den e komentario di Trouw tambe tin atenshon pa Bouterse ku e titular: "Bouterse a pèrdè un bon chèns di mustra duele: e por a hasi esaki den sala di korte." E korant ta sigui relatá ku si en berdat Bouterse a kambia i ta mira awó ku e asesinatonan tabata un krimen, miho el a regla e asuntu aki promé ku el a laga nan skoh'é komo presidente. E manera ku e ta papia di su regreso na kumbre komo korona riba trinta aña, ta basta alarmante.

nrc.next ta reportá tokante e otro desaster di zeta grandi. No esun den Golfo di Mehiko, sino esun den Laman Hel chines. Siman pasá un pipa di zeta a eksplotá den e haf di Dailan. Segun nrc.next esaki tambe a resulta di ta mas grandi ku outoridatnan a kere na prinsipio. Un supstansha manera breu ta drif den direkshon di Nort i Suit Korea i e kostanan. Segun Green Peace ta trata di e desaster di zeta ku ta konosí di mas grandi den historia di China. E mancha di zeta ta midi 430 kilometer kuadrá, i asina ta basta mas chikitu ku esun di den Golfo di Mehiko ku ta midi 7 mil kilometer kuadrá

AD ta kunsumí pasobra a but un partidó di karta na Venlo. E señora tin 19 aña ta parti karta pero poko dia ei el a haña un but pasobra el a kore ku su baiskel riba asera. E tin añanan largu ta hasi esaki, manera e ta bisa den AD: "Den dos ora mi mester parti kuarenta kilo". Pero e munisipio no ta aseptá su infrakshon mas. Deejay di Radio 1 Giel Beelen ta sostené e señora i ta ofresé di paga e but di 35 euro.

Un notisia alarmante den De Telegraaf: Hulanda ya pa algun siman ta sufri di vruminga. Ku e wer bunita ku tin e bestianan ta prokrea manera loko. Veneno i trampa di vruminga a kaba den pakusnan. Ta pesei De Telegraaf ta duna un rekomendashon gratis. Basha kané dilanti porta, i kachi kachi di kòfi tambe por sirbi komo veneno.