Resúmen di korant

Den korantnan hulandes djawe hopi atenshon pa e formashon di gabinete ku ta fayando ketu bai. Na ora di publikashon ainda no tabata konosí ku e miembro prominente di CDA Ruud Lubbers a keda nombrá komo informadó nobo pa Reina Beatris.

Trouw ta titulá riba su promé página: "Formashon ku PVV ta yega mas seka". Na Binnenhof a pensa ta kon tin ku sigui awó. Niun hende no ta duna un gabinete di sentro ku VVD, CDA, i PvdA niun depchi. E doló di kabes ta, si, ku ta VVD komo ganadó di elekshon mester tuma e inisiativa. Pero Mark Rutte lo no tin gana di bira informadó for di awó, mirando e riesgo ku e lo sufri daño si e tambe faya, segun Trouw.

Miho e lider di VVD Rutte bira informadó i skibi un konsepto di un akuerdo pa goberná. Asina CDA ta bisa den De Telegraaf, den un reakshon riba e deliberashonnan pa Paars-plus ku a faya.

Den De Volkskrant e presidente di CDA Henk Bleker ta apelá na e lider di PvdA Cohen pa investigá seriamente un gabinete di VVD, PvdA i CDA. E ta e promé un di CDA ku públikamente ta papia riba e impase polítiko den e formashon. Cohen anteriormente a bisa di no ta mira nada bon den un koalishon ku VVD i CDA.

De Volkskrant i Algemeen Dagblad tá skibi tokante Desi Bouterse pero ta De Telegraaf ku ta duna mas tantu atenshon na e presidente nobo di Sürnam. Resultadonan di e rubrika 'Ponensha di Dia' no ta laga duda: elekshon di Bouterse komo presidente di Sürnam, nos èks kolonia, ta un fayo di otro mundu. Ta un repúblika hopi atrasá i desareglá riba tereno demokrátiko, kaminda outoridatnan ta hasi i deshasí manera nan haña bon só por duna un hòmber asina poder, asina 43 porshento di e reakshonnan ta bisa. 79 porshent asta ta haña ku Bouterse no mester a partisipá mes na elekshon.

Mas aleu De Telegraaf ta skibi ku defensa a skrap e treinen anual ku nan ta tene den selva di Sürnam. Defensa mes ta bisa ku esaki no tin nada di hasi ku elekshon presidensial di Desi Bouterse. A tuma e desishon for di siman pasá i puramente pa ekonomisá.

De Telegraaf, Algemeen Dagblad i De Volkskrant ta reportá tokante di e atmishon di kulpabilidat di Bouterse. Segun De Telegraaf surnameonan ta puntra nan mes si ta trata di un atmishon di kulpa of di un manera pa purba di drecha e kos. Nan ta referí na e anunsio di Bouterse su advisor spiritual Steve Meye, ku despues di su huramentashon Bouterse lo pidi pueblo pordon pa e asesinatonan di desèmber.

Algun aña pasá Bouterse a pidi despensa kaba pa e asesinato di 15 supuesto atversario di su rezjim militar, segun Meye den Trouw. Den relashon ku e resultado di elekshon i formashon di gobièrnu tabata nesesario pa mi bin resa kune, pa dios dun'é sabiduria pa tuma e desishon drechi, segun Meye.

"Daño di lekmentu di zeta ta fòrsa BP pa tene baratiyo", Trouw ta titulá. E kompania di zeta ta trahando seriamente na un plan pa bende propiedat. Asina e kompania ke haña fondo pa e daño ku a resultá despues di e desaster den Golfo di Mehiko. Ayera djárason BP britániko a anunsiá di ta bende 7 miar dòler di kampo di gas i petroli ku e kompetidó merikano Apache.

Durante di Vierdaagse na Nijmegen a introdusí un pildora nobo pa mantené erekshon seka hoben, yamá 'Rock Hard'. Resientemente e pildora ta na benta na botika. Riba e website di e pildora ta skibi ku ta safe pa usa e pildora huntu ku alkohòl. Seksuólogo Peter Leusink ta reakshoná indigná den De Pers. "99 porshento di hoben no tin problema mes ku erekshon". Ademas e ta bisa ku e remedi no ta traha, úniko posibilidat ku e ta mira ta un efekto di plasebo.

Desempleo seka hóben ta baha pero bou di hoben alóktono e ta mes haltu. Asina nrc.next ta skibi a base di sifra di Ofisina Sentral pa Estadístika i e instansha di ònderstant UWV. Espesialmente hóbennan marokano i sürnam ta pasa trabou pa haña un empleo. Un kuart di nan ta sintá na kas. Kousa di e desempleo haltu ta falta di diploma, prehuisio di doño di trabou i un ret soshal muchu chikí.