Resúmen di korant

Interogantenan grandi awé riba portada dje matutinonan ulandes, despues di frakaso di negosiashonnan pa un gabinete Püs-Plùs. Algemeen Dagblad a titulá ku lèter di drùk grandi: 'Kon sigui awó?' Formashon di gabinete mester kuminsá tur dinobo atrobe. E intento pa yega na un gabinete Püs-Plùs, ku ta konsistí di VVD, PvdA, D66 i GroenLinks a frakasá. Lider di VVD, Rutte ke un gabinete intermedio di VVD, PvdA i CDA, pero Cohen di PvdA ta kere ku esaki tin sentido únikamente si pidi D66 i Groenlinks tambe. Un otro opshon ta un gabinete di VVD, PVV i CDA, pero kétubai CDA no ke tende dje opshon akí pues por konta ku su veto, asina Algemeen Dagblad a skibi.

De Telegraaf a habri su edishon djawe ku: 'Püs-Plùs a frakasá'. Bou dje titular akí a pone un frase ku ta duna un tiki mas speransa: 'Gabinete di VVD ku PVV i CDA na bista'. E matutino ta kalkulá, ku un gabinete derechista ta e úniko opshon pa un gabinete mayoritario. De Telegraaf ta haña ku frakaso dje formashon no ta un pèrdida, pero debí n'e krísis, Hulanda no por pèrmití su mes un formashon 'ku ta sigui chambuká den lodo' tampoko.

De Volkskrant ta informá ku kasi tur partido ku Rutte por koperá kune, ta di opinion ku nan no ta den wega. Ayera PvdA, D66 i GroenLinks a laga sa e kos akí. CDA a yega di bisa e kos akí un biá kaba en konekshon ku e resultado elektoral. Segun De Volkskrant esaki ta un problema pa Mark Rutte di VVD. E korant ta skibi ku rumor ta kore, ku eventualmente Rutte por skibi un akuerdo di gobernashon ku Maxime Verhagen, kaminda ku PVV por 'join the party' e or'ei. Ku e maniobra akí un gabinete derechista ta na bista atrobe.

Trouw ta informá ku formashon di gabinete ulandes a drenta un impase profundo. Sentro polítiko na Den Haag ta kibrando kabes pa wak kuá koalishon mester purba forma, awor ku Püs-Plùs a malográ. Rutte ta bou djun preshon haltu, ya ku elektorado di VVD no a vota pa e partido, pa forma un gabinete iskierdista. Debí na e impase akí, e posibilidat ku PVV ta aparesé na mesa di formashon a bolbe lanta kabes. Pero e or'ei CDA mester ta dispuesto sí na negoshá, asina e korant a skibi.

'Respetá Bouta meskos ku ta hasi ku Wilders', kemen aparentemente no ta tur Sürnam ta wòri ku presidensha di e èks komandante di ehérsito, segun Trouw. Por konstatá poko prekupashon sí den e reakshonnan riba elekshon di Desi Bouterse komo presidente, ounke ku por lesa palabranan ku ta relativá pero tambe di esnan ku ta kunsumí ku por ehèmpel e aktitut di rechaso di Hulanda, ku no ke risibí Bouterse. Tambe ta resultá ku Reina Bètris lo no hiba un bishita di estado na Sürnam. Pero, segun un bon konosí di famia Bouterse den deklarashon pa Trouw: 'Mi ta kere ku e shon akí lo no hasi ko'i bobo. E sa ku ta paga tinu riba dje i ku a sentensi'é. El a madurá i el a siña, i bien ta posibel ku e lo desaroyá bira e mió dirigente den region karibense'.

Eks minister ulandes di Asuntunan di Eksterior, Van den Broek a bisa De Volkskrant: 'Mi ta haña ta lástima pa Sürnam'. Elekshon di Desi Bouterse komo presidente di Sürnam ta difikultá e relashon ku Hulanda muchu mas.

Bebe hopi ta bon ora ta hasi kalor. Pero tene kuidou ku bebementu dimas, asina Algemeen Dagblad ta skibi. Tin hende ta bebe asina tantu awa, ku nan kurpa ta sali for di balanse, te bai para na hòspital ku venenamentu pa motibu di awa dimas. Hopi be e kos akí ta sosodé pa motibu ku hende ta lubidá di kome ora nan ta bebe tantu asina. Siendo ku netamente kuminda salu manera sòpi, ta importante pa retené líkido den bo kurpa.