Resúmen di korant

Elekshon di Desi Bouterse komo presidente di Sürnam ta notisia ku a sali riba portada di Trouw, De Volkskrant i De Telegraaf. Trouw a publiká dos potrèt di Bouterse: ún komo komandante di ehérsito ku barèt bèrdè riba kabes, e otro den tempu djawó, kemen un potrèt resien. E korant a pone e siguiente titular: 'Gòlpista Bouterse presidente'.

El a ekspresá palabranan di rekonsiliashon i a bisa: "E tempu ku ta tras di lomba tabata difísil pa nos, ata mi brasa akí komo gesto kordial na tur ku ta konsiderá su mes komo mi oponente. Laga nos lébumai asuntunan ku den último 35 aña a pone nos stanka. Nos, yu'i Sürnam, propietarionan legítimo di e pais bunita akí, huntu lo edifik'é. De Volkskrant a pone komo titular: 'Hefe ta yora kuater-kuater'. Bouterse komo presidente ta fasinante, eksitante, pero alarmante tambe.

De Telegraaf ta skibi ku presidensha di Bouterse lo suspendé e orden di detenshon konforme veredikto di Korte di Hustisia Internashonal. Komo hefe di estado e ta gosa di imunidat, moda ku e presidente nobo en prinsipio por bai unda ku e ke. Un kos sí: lo e no risibí un visem pa drenta Hulanda: ya e presidente t'un paria kaba, segun De Telegraaf.

Porfin el a logra: Bouta ta mustra ku krimen ta bálapena, asina De Pers ta komentá. Kriminal di droga i sospechá di asesinato múltiple. Desi Bouterse ta e presidente nobo. E korant ta puntra su mes awor si ainda tin speransa pa Sürnam.

De Telegraaf ta informá ku lo prolongá tèstmentu dje kapa nobo ku a ser'e lèk di krudo den Golfo di Méhiko: no ta e kapa akí ta kousante dje gasnan ku ta saliendo for di fondo di laman pegá ku e lèk di zeta ku a tapa. Promé tabata teme ku ta zeta ta basha bai for dje sitio pegá k'e fuente, segun e korant.

Trouw ta skibi ku e tèst pa tene e tubu di zeta será por dura ún dia mas. Djaluna pasá gobièrnu merikanu a duna pèrmit pa hasi e kos akí, apesar dje prekupashonnan ku bùbel di gas ku tabata subi bai ariba for di profundiat di laman.

Na Brazil a tira un hulandes mata riba kaya. Prensa lokal ta bisa ku e hòmber a bira víktima djun likidashon, segun De Telegraaf. Segun fuentenan anónimo e hòmber tabatin konèkshen ku dirigentenan kriminal di baho mundu hulandes, manera Dino S. i Willem Holleeder.

Kamanan di hotèl na hopi pais sur-oropeo ta muchu chikí pa turista hulandes, asina Nederlands Dagblad ta informá. Riba wèpsaitnan di biahe ta drenta hopi reklamo tokante kama chikí òf smal. ANWB tambe ta na altura di e problema aki. Ta kos ku ta sosodé na akomodashonnan bieu òf den kèmper. Kamanan di akomodashonnan luhoso por lo komun ta mas espasioso.