Resúmen di korant ulandes

Tur korant awe atrobe ta reportá ekstensivamente tokante e formashon di gabinete hulandes. Awe un selekshon chikí di e novela ku ta keda kontinuá.

Kon ta sigui ku polítika? Ab Klink a habri porta bèk pa un gabinete derechista, asina De Pers ta titulá. Awó ku di repente el a sali for di parlamento e koalishon ku PVV ta bira un posibilidat atrobe. Den De Telegraaf un potrèt di Klink ku ta sali di porta patras.

De Volkskrant a papia ku Klink. E ta defendé su mes kontra di e imágen ku e lo ta bou di influensha di e 'bieunan' den CDA. E ta bisa: 'Esaki ta kompletamente ko'i kèns, wak mi argumentunan'. Ademas e ta bisa ku na prinsipio e tabata di akuerdo ku un gabinete ku sosten di PVV. "Pero entretantu mi a pasa den un desaroyo", segun Klink.

Trouw ta titulá: Aktualmente Chavez no tin tempu pa Bouterse. Un enkuentro entre Bouterse i Chavez pa di dos be lo no tuma lugá. Djarason Bouterse lo a biaha pa Venezuela pa un bishita di estado. Pero Chavez a laga sa ku e ta okupá ku elekshonnan pa parlamento den su pais 26 di sèptèmber. Bouterse ke bishitá e kabesnan di estado den regio; e ta buskando rekonosemento internashonal. Te awo su strategia no ta trahando. Despues ku Chaves a rechas'é no tin bishita grandi riba Bouterse su agenda, segun Trouw.

Bert de Rooij, e abogado hulandes di Joran van der Sloot, no ta komprondé pakiko e sospechoso di asesinato a tum'aden pa duna e periodista di krímen John van den Heuvel un entrevista. T'asina ku ya kaba ta eksistí un sierto imágen di Van der Sloot, i atenshon na e momento aki no ta yuda su kaso. Djaluna e emisora di televishon RTL4 a transmití e entrevista i e abogado ta haña ku esaki no ta kumbiní Van der Sloot. "Pero kisas huntu ku su abogado peruano nan a pensa ku sí esaki ta kumbiní, ami no sa", segun De Rooij den De Volkskrant.

"Probechadónan ta pone desishon tokante Antia na peliger", asina tin pará riba un artíkulo den De Telegraaf. E mandatarionan a daña na pará seka PVV i SP. E partidonan aki ke para independensha di Kòrsou i Sint Maarten, despues di notisia ku mandatarionan di Kòrsou ke subi nan mes penshun atrobe. PVV i SP tin miedu ku e sanashon di debe di 1 punto 5 miar euro ta plaka tirá afó i ku mandatarionan lokal ainda no ta sirbi. "Esaki ta prueba atrobe ku ta gasta nos plaka", asina parlamentario di PVV Brinkman ta bisa. "Nos mester stòp e kos aki inmediatamente.". SP ta boga pa un konferensha di emergensha tokante "e krisis den Reino" pa drecha finansa riba e islanan.

Si komo mayor bo ta preferá di haña un yu muhé bo por influenshá sekso di e yu ku bo ke haña, segun De Volkskrant. Si un muhé sigui un dieta ku tiki salu i hopi kalsio e chèns ku e ta haña un yu muhé ta subi. T’asina si ku e relashon mester tuma lugá algun dia promé ku ovulashon., tur esaki Maastricht Universitair Centrum a investigá.

I si bo no por haña yu, Medisch Centrum na Leiderdorp tin èmbrio den baratio. Nan ta disponibel mesora pa donashon, De Telegraaf ta skibi. Ta e asina yamá embrionan di tèst di pareha ku entre tantu a haña yu i ku no kera distruí e èmbrionan ku a sobra.

De Telegraaf ta skibi ku míles di muhé hulandes ta pèrdè ekstremamente hopi sanger ora nan duna lus. Ta trata di un mínimo di 1 liter di sanger pero hopi be ta mas tantu. E ginekólogo di Nijmegen Mallory Wolski ta bisa ku tin be ta trata di un situashon ku ta menasá bida. No ta kla kuantu hende muhé ta fayesé di pèrdida di sanger. Universitair Medisch Centrum Sint Radboud ta kuminsá un investigashon riba kousa di e oumento di sangramentu aki.