Resúmen di korant, 6 di sèptèmber

De Telegraaf ta habri ku un entrevista eksklusivo ku Yoran van der Sloot den su sèl den prizòn Castro Castro na Peru. "Mi ta fèrwagt di keda hopi tempu den prizòn aki na Peru", segun Yoran. Ademas e ta atmití di a estafá e mama di Natalee Holoway. E di: "Mi kera hunga nan un pego. Nan tin sinku aña ta amargá mi bida."
Yoran segun e mes ta bisa a gaña ku el a dera e kurpa di Natalee bou di fundeshi di un kas na Oranjestad. Famia Holloway a dun'é 25 mil dòler pa e informashon aki. Despues el a hui bai Peru.

PVV, CDA i VVD ke manda Antiano sentensiá pa delitu di violensia serio bèk Antia, Algemeen Dagblad ta skibi. E partidonan tin un mayoria den parlamentu i ta di shòk pa e kantidat di insidente di tiramentu kaminda antiano ta envolví. E migrantenan ta bonbiní na Hulanda solamente si nan tin posibilidat di un trabou fiho òf un edukashon Antia no ta haña ta bon idea pa manda e hóbennan problemátiko bèk.

VVD na Den Haag ke pa munisipio stòp ku ayudo di desaroyo i pa Reino tuma e tarea. "Habitantenan di Den Haag no ta ferwagt ku e plaka ku nos ta haña seka nan ta bai pa ayudo di desaroyo", asina Lakerveld, e miembro di VVD den konseho munisipal ta bisa den Algemeen Dagblad. Ainda Den Haag ta sostené mas o menos 10 proyekto na Sürnam, asta awó ku Desi Bouterse ta na mando. Lakerveld ta haña ku ta un tarea di gabinete pa duna sosten internashonal. "Gobièrnu lokal mester ta okupá ku maneho lokal i no ku proyekto na Sürnam."

E fin ta yegando pa 'e pais Antia Hulandes', Trouw ta skibi. For di djasabra e desmantelashon a yega hopi mas serka. Konseho insular a vota pro e Areglo Estatal. E paso tabata importante pa tur sinku isla ku huntu ta forma Antia Hulandes, e korant ta bisa. E desishon ta pone ku e konferensha di mesa rondó djaweps na Den Haag por sigui. Si tur kos sigui manera a planeá dia 10 di òktober Korsou i Sint Maarten lo bira pais outónomo den Reino. Saba Statia i Bonèiru lo bira munisipio speshal di Hulanda.

E echo ku nan a bai laga formashon ta sali PVV di bon, De Telegraaf ta skibi. PVV ta e partido polítiko mas popular i lo a haña 34 asiento si lo tabatin elekshon aworakí. Ku esaki Wilders ta gana 3 asiento aseka i Mark Rutte di VVD ta entregá tres. VVD i PvdA den sondeo tur dos tin 25 asiento, CDA a keda riba 15 i te ainda no a logra di kambia e kantidat histórikamente abou aki den algu mihó, segun De Telegraaf.

Den tur korant naturalmente tin atenshon pa e echo ku formashon di un gabinete derechista a para. Paisnan abou ta den un krísis, De Volkskrant ta skibi. Hulanda i Bèlgika tres luna despues di elekshon, tur dos ta bèk kaminda nan a kuminsá .

De Volkskrant tin notisia di e demonstrashon kontra violensha kontra homoseksualnan djadumingu na Amsterdam. Polis a kalkulá ku tabatin mas o ménos 1000 hende. E protesta tabata un akshon di e grupo 'Right to feel safe'. E demonstrantenan a pasa algun lugá kaminda último tempu a molestiá òf usa violensha kontra homoseksual.