Resúmen di korant ulandes

'Tur kos tabata pòrnada', ta titular ku por mira den De Volkskrant. Band'i dje no a pone ningun artíkulo, sino un potrèt grandi so di Maxime Verhagen, ku su mirada tristu. Mas aleu den e korant ulandes por lesa un rekonstrukshon dje siman di krísis den seno di partido CDA, ku'n potrèt korespondiente ku ta mustra e porta mas filmá di Hulanda: ta trata dje porta di sala di frakshon di CDA den Tweede Kamer, o sea parlamento ulandes.

Algemeen Dagblad a skohe tres potrèt dje protagonistanan polítiko pa pone riba su portada, tur tres ku boka duru será. 'Kos a frakasá tòg', asina ta pará ku lèter pretu diki-diki.

De Telegraaf a pone e siguiente titular: 'Rutte ta eksigí papel di protagonista'. E kabesante di VVD ke tuma timón den e proseso di formashon, ya ku el a proponé pa e mes skibi konsepto dje akuerdo di gobernashon. Bou dje titular grandi tokante Rutte por mir'un potrèt di Maxime Verhagen ta 'shake hands' ku Geert Wilders. Ta e momento ku Wilders a kaba di splika kon e ta mira frakaso dje formashon. Verhagen ta na kaminda pa su konferensha di prensa.

E mes korant, esta De Telegraaf, tabatin un entrevista ku Joran van der Sloot. Reportero di krimen, John van den Heuvel a bishitá Van Der Sloot den prizòn Castro-Castro, un instituto penitensiario super-sigurá na Lima, kapital di Perú. Djaluna awor ta publiká e entrevista den e korant, pero for djawó De Telegraaf ke revelá algu sí. Parse ku Van Der Sloot ta duna lès di ingles na wardadónan dje prizòn. E hóben ulandes, sospechá di dos asesinato, entretantu la kuminsá kustumbrá un tiki den e prizòn mas fastioso di Perú. Pronto lo poné huntu ku otro prezu ekstranhero. No ta den korant so por lesa e entrevista ku Joran. Djaluna anochi por mir'é na televishon tambe. RTL4 lo transmití e entrevista di John van den Heuvel ku Joran van der Sloot.

Munispio di Den Haag di tur manera lo sigui sostené band'i dies proyekto na Sürnam. E echo ku Desi Bouterse a asumí puesto di presidente di e pais no ta trese ningun kambio den esei, segun wethouder di integrashon, Marnix Norder di PvdA, den deklarashon pa Algemeen Dagblad. Resientemente gemeente Amsterdam a disidí pa para e relashon ku Sürnam. Ta pa proyektonan humanitario so ta hasi un eksepshon.

Munispio di Den Haag tambe ta yuda mas o ménos dies proyekto, ku no tin nada di aber ku gobièrnu sürnam. Ta proyektonan ku institushonnan privá a inisiá. Den práktika di tur dia ta trata di suministro di kòmpiuter bieu na kas di wérfano òf di re-dekorashon di kushina di skol pa kòki. Tur esaki ta enserá un montante di 75.000 euro. Ku e maneho akí Den Haag ta desviá konsientemente djesun di Amsterdam, asina wethouder Norder a splika. E munispio no ke balotá Bouterse niun ora so. 'Nos ta haña ku Den Haag mester keda neutral komo siudat di hustisia i di pas', asina el a bisa Algemeen Dagblad.

Mas aleu por lesa den Algemeen Dagblad ku esun ku ke barka i biaha na tempu for di airopuerto Schiphol, mió e bula ku un kompania ulandes. Esaki ta resultado di estadístikanan di EU-Claim, un empresa ku ta yuda pasaherp entregá kleim di indemnisashon ora surgi retraso di buelo. Turkish Airlines ta e kompania ku mas retraso: último aña 41 porshento dje buelonan tabata muchu lat. E úniko kompania ulandes ku ta pará den e Tòp-dies di retraso frekuente ta Arkefly.