Resúmen di korant ulandes

Wèthouder Rabin Baldewsingh a bolbe haña ta responsabilisá su mes den konseho munisipal di Den Haag. Esaki a sosodé dos be anterior pa motibu di su deklarashonnan hasí den prensa. E biaha aki ta pa motibu di su análisis tokante kon Desi Bouterse a keda elihí komo presidente di Sürnam. Su análisis a kousa furia den konseho munisipal. Baldewsingh a bisa den e korant Trouw ku Bouterse a hasi algun kos malu pero ku e ta representa tambe un entusiasmo nobo. Baldewsingh a deklara tambe ku Bouterse a keda elihí demokrátikamente. 'Nos mester respeta esaki meskos ku na Hulanda nos ta respeta Geert Wilders.'

Un dia despues Baldewsingh a bisa ku su deklarashonnan no tabata bon i ku no tabata su intenshon di kompará Wilders ku Bouterse. Pero ta hustamente e komparashon di Wilders ku Bouterse a okashoná hopi krítika den konseho munisipal. Kas tur partido, ku eksepshon di PvdA, e partido di e wèthouder, i e partidonan chiki, tur otro partido tabatin krítika. E miembro di konseho munisipal di PVV Machiel de Graaf di: 'Kon e por hinka un kos asina den su kabes?' VVD, CDA i D66 tambe a ekspresa nan mes den palabranan similar, segun Trouw

AD ta skibi ku presidente Bouterse di Sürnam a kibra silensio. Siman k'a pasa e no tabata na trabou, asina el a splika ayera, paso e tabatin dengue i e tabata hopi kansa. Último dianan tabatin hopi spekulashon tokante su malesa. Tin hende a bisa ku Bouterse a haña un atake selebral. Un desapunto pa Bouterse ta ku e konferesha di CICAD, Inter-American Drug Abuse Control Commission no ta tuma luga mas na Paramaribo.
E plataforma multilateral pa kombatimentu di droga, ku ta kordina e maneho di droga di 34 pais no a bisa dikon e konferensha na Paramaribo no ta siguí mas. Kla ta si ku e desishon aki ta un desapunto grandi pa Bouterse.

Segun Hedwiges Maduro, komunidat antiano ta sumamente kontentu ku e bolbe den selekshon di Hulanda. 'Nan ta gosa hopi di Oraño. Durante kampionato mundial rònt Antia tabata oranõ', asina e ta bisa den AD. E ta e di dos hungadó despues di Sonny Silooy di Ajax, di sanger antiano ku ta hunga den selekshon di hulanda. 'Pero tin mas na kaminda. Leroy Fer i Vurnon Anita a hasi nan debüt kaba. Patrick van Aanholt di Chelsea ta hunga den Jong Oranje. 'Tin hopi talento Antiano', asina Maduro ta bisa den AD.

Den AD nos por lesa tokante e problemanan ku tin ku e trein di halta velosidat Fyra ku ta kore entre Amsterdam i Rotterdam. Tur dia ta solamente un promedio di 15 porshento so di e treinan ta yen. Mas o menos 75 pasahero pa kada trein. Pa hasi Fyra mas popular Nederlandse Spoorwegen pa algun luna kaba ta bende karchinan di trein na mitar di preis. NS ta kere ku Fyra lo bira mas popular ora e treinan kuminsa kore 4 be pa ora entrante òktober.

Butnan pa foutnan kometé den tráfiko ta ba subi ku 15 porshento. Asina de Telegraaf ta skibi. Awe gabinete demisionario ta diskuti e medida aki ku nan lo anunsia aki tres siman riba Prinsjesdag. E butnan ta konta pa outomobilista ku kore demasiado duru, papia na telefòn tras di stür no handsfree i kore pasa dor di lus korá.