Resúmen di korant ulandes, 2 di sèptèmber

Den media ulandes hopi atenshon pa CDA, ku despues di dos dia di deliberashon intensivo a disidí di sigui negoshá numa ku VVD i PVV pa formashon djun gabinete nobo pa Hulanda.

E korantnan a pone formadónan di gabinete Ab Klink i Maxime Verhagen riba nan portada. Mayoria matutino a logra publiká e kompromiso sí, ku a sera den oranan di mardugá. Ta Algemeen Dagblad i NRC Next so a bin ku titularnan manera: "Klink a dal porta sera" i "E ruptura akí no ta kos ku por pega mas". "CDA a sera fila", ta titular ku a sali den De Telegraaf.

Den De Volkskrant por lesa un análisis dje krísis entre, manera e korant ta yam'é antó, 'polítiko di poder Verhagen' i 'ideólogo di partido Klink'. Supuestamente ta Klink t'esun ku, kontrario na Verhagen, no ta tira balornan demókrata-kristian afó durante negosiashon. Pues ta loke el a kaba di demostrá awor, segun inisiadonan.

Nederlands Dagblad ta skibi ku lider di PVV Wilders a pone e divishon den seno di CDA bin ariba. Segun e korant e krísis den CDA ta trata e pregunta fundamental kiko ta e ideal mas profundo dje partido. CDA ta un partido di gobernante ku mester dirigí e pais òf kisas e prinsipionan dje partido no ta pèrmití sierto tipo di koalishon? Al fin i al kabo e pregunta ta keda sin respuesta. Mando di e partido ta dividí. Verhagen ke goberná, Klink ke duna su prinsipionan preferensha.

De Volkskrant ta komentá rib'e potrètnan di Desi Bouterse, ku presidente suplente di Sürnam, Robert Ameerali a saka. Rib'un vidio kòrtiku por mira Bouterse na kas ku'n sonrisa, pero e ta aparentá debil sí. Ta e promé imágnennan dje presidente sürnam despues di 10 dia di ousensia. Ameerali a saka e mini-vidio ku su selular i e no ta dura ni sikiera un minüt.

Ameerali a disidí di graba Bouterse despues k'e informe tokante un derame serebral, ku Bouterse lo a sufri, a sali den De Volkskrant. Abogado Gerard Spong a notifiká e korant dje kos akí. Ameerali a refutá e notisia bisando ku ta kansá di mas so Bouterse ta. Segun e último informenan Bouterse lo aparesé atrobe den públiko mañan djabièrnè pa instalashon di miembronan di Konseho di Estado sürnam, asina De Volkskrant ta skibi.

Muhénan na estado ta pasa doló sin ta na nodi durante parto na hòspitalnan hulandes, asina Algemeen Dagblad ta informá. Na hopi hòspital t'asina ku damanan ku tin ku duna lus no por konta ku angúa di anestesia den lomba, ku ta aliviá doló inmenso na ora di parto. E tipo di kombatiment'i doló akí mester ta disponibel 24 ora pa dia, asina a palabrá ya ta dos aña pasá, pero na 15 hòspital na Hulanda esaki no t'e kaso. Aya por fria doló di 9 pa 5 so, kemen di den oranan di trabou. Esnan ku tin ku duna lus mardugá tin mala suèrtè.

KLM i Air France lo tuma medida kontra pedofil. Air France a dikta ku henter e bloke di asiento djun pasahero menor di edat, ku ta biaha sin kompaño, mester ta 'liber di adulto'. KLM ta kleim di ta paga bon tinu riba menornan di edat, ku ta biaha nan so. "Nos ta hasi esaki entre otro pa medio di pedofil", asina un bosero a konfirmá. Segun Algemeen Dagblad, KLM no ke bisa si a yega di surgi insidente. Serka Air France sí esaki tabata e kaso.