Resúmen di korant, promé di sèptèmber

Tur korant ulandes ta habri ku e problemanan di formashon i e krísis den CDA.
"Formashon ta krak", Amigu Ab ta kometé atentado", "Gabinete derechista seka di muri", "Formashon ta parti CDA na dos", esakinan ta djis algun titular.
Riba e potrètnan riba e promé páginanan por mira e dos protagonistanan: Ab Klink i Maxime Verhagen. E imágen di un Ab Klink ku kara tristu, kanando su so den pasio di Tweede Kamer, ta dominá.

Trouw ta skibi ku no tin masha prueba kontra di e yemenitanan, sospechá di terorismo, ku a arestá djaluna na Schiphol. A akusá nan dos di ta preparando un atentado, pa motibu di loke tabatin den nan ekipahe.

Fuentenan di reshèrshi ta bisa ku nan no konosé otro mes. Ademas ta difisil pa prueba ku e maletanan ta di e sospechosonan, De Telegraaf ta bisa.

De Telegraaf ta menta tambe ku e doñonan di e mina ku a basha 'den na Chile a pidi despensa públikamente. Simannan largu nan a laba nan man den inosensia. Den un transmishon bibu di un enkuesta parlamentario nan a bisa di ta kompletamente konfundí pa motibu di e situashon. Den e mina tin 33 minero ku segun ta fèrwagt lo no por sali te aki tres luna.

De Telegraaf ta skibi ku Obama no ta kanta gloria. Ku un optimismo kouteloso el a splika pueblo fin di e mishon na Irak. El a evitá un tono di triunfo i no a papia palabranan manera “ora guera kaba", ku a duna su prekursor Bush hopi krítika. E mishon na Irak no a kaba. Tin hopi kos di hasi ainda, ma Estádos Unídos lo mester laga kos den man di irakesnan awó, sin bandoná nan.

Spits ta puntra su mes si Joran tin un frei den prizòn. Tin un dama ku tur siman ta bin bishit'é den prizòn i ta trese kuminda p'e. Ta un konosí di mama di Joran. E ta papia spañó i hulandes bon i tur siman e ta paga e wardadónan di prezu 100 dòler pa e por drenta. Den kombersashon ku e otro prezunan Joran a yama e dama 'mi amiga'. Spits ta saka e informashonnan aki for di e korant merikano National Enquirer.

Den Spits tambe e notisia di un remedi nobo kontra tròmbos ku pronto lo subi merkado na Hulanda. E remedi kontra koagulashon di sanger yama rivaroxaban i ta pone ku no tin nodi pa pashènt akudí na poli pa kontrolá sanger. Mundu médiko ta mira e remedi komo revolushonario.

Bon kontakto entre dòkter i famia di defuntu por oumentá e kantidat di donor di órgano ku 10 te 20 porshento. Asina e investigadó Remco Coppen di Utrecht ta bisa De Telegraaf. Kondishon ta pa trata e famia ku kompashon i trein dòkternan bon kon hasi e pregunta si por usa órgano di e defuntu. Esaki segun Koppens lo ta mas efektivo ku e sistema di bisa riba papel ku un hende no tin nada kontra pone órgano na disposishon di mundu médiko òf un pashènt den nesesidat.

Hulanda ke saka un dama buskadó di asilo angoles i si ta nesesario usa kinderbescherming òf un wes pa separ'é for di su yunan. E muchanan lo mester bai keda serka un famia di kriansa òf den un kas di kuido infantil, asina Trouw ta skibi. Estadia di e señora na Hulanda ta ilegal i e ta ninga di sali. Defence For Children ta indigná i ta bisa ku no por separá mama i yu pa e motibu aki, solamente si ta trata di maltrato.