Kentura di Elfsteden, e palabra aki, ku un señal di sklamashon ta para awe riba portada di AD. I esaki ta eksaktamente loke tin atenshon awe di tur matutino. Tur ta dediká mas ku un página na e evenementu di skats ku nan ta organisa na Friesland. Speransa, esei ta loke tur korant tin, ku e kareda di skats akí por tuma luga e aña aki si. Manera Trouw ta skibi e di 16 Elfstedentocht ta parse mas seka ku nunka. 15 aña pasa e kareda, mundialmente konosi a tuma luga pa di último be. Esaki por sosode solamente riba eis ku ta 15 sèntimeter diki.

Riba e promé página di de Volkskrant nos por mira hende ta skats riba kanalnan na Amsterdam i esaki ta un kos ku kasi nunka no ta sosode. E korant ta skibi tambe ku e 22 asina yamá Rayonhoofdnan, esta esnan ku ta disidí si e evenementu di skats na Friesland ta tuma luga si of nò, a reuní djadumingu anochi pa papia tokante un eventual Elfstedentocht. E último kareda a tuma luga na 1997. Pero De Telegraaf ta skibi: nos tur ta warda ansioso riba e palabranan 'it giet oan'- fries pa 'E ta bai tuma luga'.

Fidel Castro a aparesé djasabra pa di promé be den publisidat. E èks diktador di Cuba di 85 aña a presenta su buki 'Geriyero di tempu', den su trahe di entrenashon di kustumber, asina AD ta skibi. Castro a tuma no menos ku 6 ora pa e duna un aklarashon riba su biografia di kasi 1000 página. E mes a atmití ku e no mester a warda mas tantu pa e skibi historia di su bida i trabou: "Mi memoria ta kuminsa laga mi un tiki na kaya."

Trouw a papia ku parlamentario Anouschka van Miltenburg di VVD tokante hañamentu di yu pa plaka. Orun hende muhe ku ta duna lus na yu di un otro mama i ta kobra sèn pa esaki. Segun VVD mas i mas mayor ta drenta den un avion biaha bai Ukraina, India o California pa nan haña un yu via di mama ku a pone su matris disponibel. Pero ta masha difisil pa e mayornan por bira legalmente mayor di e yu. Sekretario di estado di hustisia Teeven ke bai trese kambio den e situashon akí.

Den Trouw tambe nos por lesa ku wes na Sürnam a dikta den su sentensia ku un persona mester pidi un otro despensa via di Facebook. Dos hòmber ku tabata partner den un negoshi i ku tabata zundra otro via di medianan sosial, mester pidi otro despensa awor públikamente via di Facebook. Si nan no hasi esaki, nan mester paga un but haltu.

E dos hòmbernan tabata akusa otro di ta daña otro su nòmber i honor i nan a disidí di bai korte. Wes a dikta ku nan mester hala nan palabranan insultante aden. Ku e sentensia aki wes ta spera ku mas yu di Sürnam ta tuma paso hurídiko despues di pleitu via ínternèt. Hendenan na Sürnam ku ta uza Facebook lo pensa awor hopi bon promé nan ofendé otro online.

De Pers ta konsehá studiante hulandes pa bai emigra, pasó studia na Hulanda ta simplemente ta hopi karu. Ku tur e medidanan manera bùt pa esnan ku studia mas tantu aña ku tin stipula pa un estudio, ekonomisashon riba beka pa un di dos estudio i hür di kamber astronómiko, ta mihó e studiante emigra, asina e korant ta konsehá. Na Ostria, Swesia, Norwega, Dinamarka i Finlandia studia ta gratis i na Bélgika un studiante ta paga solamente un kontribushon chiki.

De Pers ta hasi un kalkulashon. Si bo konta collegegeld, un aña di hür i un aña di serbes, un studiante na Hulanda tin ku paga mas o menos 7577 euro. Ta na Norwega so un studiante tin ku paga mas tantu, 8216 euro pa aña. E pais mas barata ta Ostria, ei un aña di estudio ta gosta 4205 euro.

Studiante no por skibi mas, asina nos por lesa den de Volkskrant. Hubentut a kustumbra di tek riba nan lèptop o kòmpüter. I durante un siman di tèst durante kual nan tin ku skibi e kontestanan na man, nan ta haña kramp na nan man, pols i brasa. Dosentenan ta keha ku nan por lesa solamente 50 a 50 % di e palabranan. Antes tur hende tabata skibi nètchi pega nan otro, pero awor ta uza tur sort'i estilo di skibimentu dor di otro. Un dosente di Vrije Universiteit na Amsterdam ta kere ku tòg ku e tèstnan skibi nan man hopi be ta benifesioso pa e studiante, paso e dosente ta inkliná na lesa un bon kontesta den e loke e studiante a skibi.

Un mucha muhé di 16 aña di Nieuwegein a pasa djasabra marduga pega na un pal'i lus. Asina AD ta skibi. E mucha muhé a pusta ku e por para sunchi e pal'i lus, pero komo ku tabata vris asina pisa, e kos a bai malu. Polis a pasa mira e mucha muhé di vris nan e pal'i lus i a yudé sali for di su situashon penibel. Ku un hèmber di awa kayente nan a logra los e mucha muhé. Despues ku personal di ambulans a samin'é e por a bai kas e mes.