Vestia, e korporashon di bibienda ku ta den problema. Ta titular riba portada di De Telegraaf i het Financieel Dagblad. Vestia a pasa barionan kompleto na Rotterdam, Delft i Den Haag pa e koperashon Waarborgfonds Sociale Woningbouw, esei ta titular den De Telegraaf. Awor ku e korporashon no tin e kasnan mas bankonan ABN Amro, JP Morgan i Deutsche Bank lo no por haña nan sèn bèk mas. Vestia debe e bankonan miares di euro. E korporashon di bibienda ta kasi fayit pa motibu di seramentu di seguronan dudoso.

Un hòmber ku a agredí un shòfùr di bùs dos aña pasá na Breukelen a sali liber pa un eror di Ministerio Públiko. E hòmber lo kera hinka e koredó di bùs. Asina por lesa den AD. Ministerio Públiko kera laga e afghano di 52 aña haña tratamentu obligatorio despues di su aresto pero a hiba e petishon muchu lat. Ministerio públiko ta teme ku e hòmber lo bolbe komete mesun akto i ta papia di un eror grave. Mester a hiba e petishon korte, 30 dia promé ku e hòmber a sali liber. Ayera a sali na kla ku a hiba e petishon 4 dia mas lat na korte.

Kada siman un konduktor hefe di NS, kompania di trein hulandes, ta bira víktima di agreshon, asina por lesa awe den Metro. E matutino ta públika sifranan di e promé kuartal di e aña aki. E promedio di kantidat di notifikashon di agreshon físiko a subi e aña aki kompará ku aña pasá. NS no por splika kiko ta e motibu. Posiblemente e problemanan ku trein den wenter ku o e buki nobo di orario di trein lo ta algun di e motibunan. NS ta haña agreshon of intimidashon di su personal inaseptabel. "Pero bo no por evita agreshon ora bo tin di haber ku mas ku un mion pasahero pa dia", asina e kompania di trein a deklará.

Hero Brinkman tin 23 kandidato potenshal pa bai elekshon huntu kune na sèptèmber. Esei e èks miembro di PVV ta bisa den Spits. Brinkman ke buta 12 pa 15 persona riba lista di kandidato di su partido Onafhankelijke Burger Partij o sea Partido di Suidadano Independiente. "Nos ta boga pa kalidat na luga di kantidat", segun Brinkman. "Esakinan ta un pa un personanan krítiko ku ta para riba nan mes pia i ku ta tribi bisa nan lider loke nan ta pensa".

Esun ku den futuro ta bai trabou ku su outo, lo tin ku paga mas ku loke ta pará den e akuerdo di koalishon di Kunduz. Asina por lesa den het Financieel Dagblad. E gastunan ta bai subi asina tantu ku outomobilistanan huntu lo bai paga 400 mion di euro of mas, esei sektor di outomobil Bovag a partisipá. Segun e sektor e koalishon di Kunduz, e sinku partidonan ku a firma e akeurdo presupuestario, a balota e ganashi di e medida nobo. Koalishon ta spera ku di ekonomisá ku 1.3 miar di euro pero segun Bovag ta bai ekonomisá ku mas ku 1.7 mion di euro. E medida ta enserá ku ta bai para kontribushon di kilometer pa esnan ku ta bai trabou ku nan outo.

Mas notisia tokante e akuerdo di sinku partido: segun de Telegraaf, e kualishon ta protehá amantenan di arte i esnan ku ta tene eksposishon. Nan a reservá miones pa asina por baha e kontribushon riba impuesto general di konsumo riba arte i obhetonan di kolekshon.

NRC Next ta presta hopi atenshon na elekshonnan ku ta tuma lugá awe i mañan na Egipto. Ahinda ehèrsito tin hopi poder na e pais, pero e habitantenan no tin miedu. Ounke ku ta asina ku e optimismo pa loke ta trata 'Primavera Arabe' a baha basta último aña i mei. E proseso demokrátiko na Egipto no ta kla ahinda. Egipsionan ta bai urna pa skohe un presidente nobo pero ahinda ni kuminsá skibi e lei di konstitushon nbbo ku tin ku deskribí funshon di un presidente.

Por lesa den AD kanal di televishon Evangelische Omroep ta bai transmití un entrevista ku un pedoseksual den su programa 'Jong'. E hòmber ta konta di su amor pa mucha hòmbernan entre 8 pa 13 aña. Awenochi ta pasa e entrevista na televishon. Pero ya kaba a surgi tamtam. Lo no ke pa pasa e entrevista na televishon. I e presentadó ya kaba ta defendiendo su mes ku e argumento: 'esnan rechasá tambe tin mag di konta nan historia'.