Niun hende na Boneiru no ta wardando legalisashon di aborto, Trouw ta skibi den un artíkulo. Hòspital Mariadal tampoko no tabata masha entusiasmá pero sinembargo a pidi un pèrmit. ‘Nos mester a pidié’ manager Theo Breken ta bisa ‘pasobra interupshon di embaraso ta pará den lei awor ku Boneiru ta munisipio di Hulanda’. Pero e instanshanan konserní no ta masha kontentu.

Direktor Riet Sealy di Sentro pa Hubentut i Famia a preferá di posponé legalisashon di aborto Promé e ker a haña tempu pa konsientisá hóbennan di nan kondukta seksual. I informashon tokante kontraseptivo ta hopi nesesario pasobra hóbennan sa masha tiki tokante esaki. Asina dos mucha muhé a kont’é ku nan ta parti un pildora huntu pa falta di plaka.

Bon notisia den tur korant: hubentut ta bira mas bon mucha i mas salú. AD i De Volkskrant tur dos ta skibi esaki. Hóben hulandes último añanan ta huma i bebe ménos i nan ta sali ménos ku amigu tambe. Ademas nan ta bira aktivo seksualmente ora nan ta mas bieu. Esaki a sali for di un investigashon di World Health Organization. E investigadónan ta haña ku mayor hulandes meresé un kòmplimènt. Nan a bira mas estrikto pero nan yunan, kompará ku hoben den otro pais ta mas felis i ta konfia nan mayornan.

Den De Telegraaf kontesta riba e pregunta ku e korant a hasi su lesadónan ayera, esta, kon kos mester sigui ku Kòrsou kaminda tin un nivel di kriminalidat inkreiblemente haltu. E lesadónan a kaba lihé, nan di regalá e isla na Venezuela. Kòrsou ainda nan ta mira komo un bon destinashon pa fakansi, ounke nan ta remarká ku e habitantenan di e isla no ta kariñoso ku hulandes. Pero bou di un otro bandera nan ta pensa ku Kòrsou lo bira mas barata. Un lesadó ku a biba na Kòrsou ta hopi preokupá pa dushi Kòrsou: E habitantenan desente ta muri bai, e a bisa.

No solamente polítiko, sino tambe fanátiko di Oranje ta evitá bai Ukraina. Esaki ta pará na lèter asina grandi riba promé página di De Telegraaf. Pa benta di karchi i pa biahe di Oranje kos ta ketu. I ku tur tenshon polítiko i atentado di siman pasá keintura di Oranje ta mas abou ku nunka.

Èks organisadó Ukraina no ta kontentu ku tur e atenshon di derecho humano NRC next ta skibi. Bon relashon diplomátiko ku Oropa i un bon transkurso di Kampeonato Oropeo ta importante pa e pais. Kisas dje importante ei, ku èks promé minister Timoshenko, ku ta será awor aki, lo sali liber.

Trouw ta habri ku e echo ku coffeeshopnan ta kedando bashi awor ku mester di un pas pa kumpra mariwana. For di ayera, ta uzadó registrá so por kumpra nan softdrug. Pa kasi 100 trahadó di coffeeshop den e regionnan Eindhoven i Maastricht, a pidi retiro ofishalmente. E promé dia di e asina yamá wietpas a pasa ku hopi emoshon. Dos doño di coffeshop na Maastricht i Tilburg intenshonalmente a keda sin tuma nota di e medida kontra turismo di droga. Nan a haña un aviso ofishal.

Riba promé página di De Telegraaf a sali potrèt grandi i nòmber di e hóbennan ku ta buska den relashon ku e atrako fatal riba hoyero Ruud Strattman na Den Haag. De Telegraaf ta skibi ku mayornan di e mucha hòmbernan ta stroba polis. Nan lo sa unda nan yunan ta ma nan no ta bisa polis. AD ta bisa ku e búskeda a bai te Bèlgika. E hobennan lo a hui bai einan.

Investigadó aleman a deskubrí sentenar di dokumento sekreto di Al Qaeda na un kaminda remarkabel: den sine di pòrno. Segun De Telegraaf e sinenan tabata riba un USB stick ku un sospechoso di teror di Oustria a skonde den su karson djabou. Ekspertonan ta kere ku e dokumentonan ta plan pa futuro atentado. Ofishalnan di informashon merikano ta papia di un ‘hayasgo’ di oro.