Minister di Hustisia di Kòrsou, Elmer Wilsoe ta purba na stroba investigashon hudisial di un rifero. Asina por lesa den De Telegraaf. Bou di e titular 'Minister ta defendé mionario', e korant skibi tokante di e pleitu entre Wilsoe i ministerio públiko na Kòrsou. E sospechoso prínsipal esta Robbie dos Santos ta finansia e partido di Wilsoe, asina e korant ta skibi. Pero esei no ta klòp. Pasombra e doño di kantor di number ta finansia partido MFK.

Minister di finansas di Kòrsou, Jamalodin tambe ta sospechoso den e kaso. Segun De Telegraaf Wilsoe ke yuda tur dos. Aparentemente Hulanda su metementu no a spant'é. E ta kibra ku tur regla i ta mete ku kasonan individual den korte. Hustisia na Kòrsou ta teme kondukta di Wilsoe lo tin konsekuensianan negativo pa kombatimentu di krímen na Kòrsou.

Costa Rica ke hiba aktivista di medio ambiente Paul Watson dilanti. Watson lo ta trese bida di e tripulashon di e barku na peliger. Ayera polis a arestá lider di e moveshon 'Sea Shepherd' na Alemania. Costa Rica a pidi su ekstradishon. E moveshon medioambiental ta deklara den Trouw ku ta trata di un akusashon di 10 aña pasá. E barku di Watson a persiguí un trafikante di ala di tribon na momentu ku nan tabata trahando un dokumentario. Mes ora a akusá Watson di asesinato pero a lag'é bai despues di e mira loke el a firma. No ta konosí dikon a detené Watson na Alemania.

Nashonnan Uní ke pa paisnan den desaroyo respetá derechonan di pueblonan indígeno na momentu ku ta bende tereno of hür e invershonistanan di eksterior. Ta pesei e titular ku Nederlands Dagblad a publiká riba su portada ta: 'Indikashon di Nashonnan Uní pa proteha kunukeronan na paisnan pober'. E organisashon di pueblonan ta spera ku miones di hendenan pober di e manera aki ta keda tin akseso na nan tereno, laman kaminda nan ta piska i mondinan kaminda nan ta biba di generashon pa generashon.

Segun Marc Dullaert, defensor di mucha, un di kada 10 mucha na Hulanda ta lanta den pobresa. Esei ta ensera ku mas ku 300 mil mucha hòmber i muhé no ta kome kuminda salú, esta segun di De Telegraaf. Den mayoria kaso no tin sèn tampoko pa paga pa bai djem, of tuma lès di landamentu. E muchanan tin ku bisti paña i sapatunan bieu. Dullaert ta konstatá esaki den e promé monitor hulandes di derecho di mucha.

Mas ku 80 porshento di hóbennan bou di 30 aña ku ta online no ta bon protehá. Esei ta notisia ku Spits! a públika riba su portada. Nan ta uza e mesun konsigna, nan no ta traha un bèk up i no ta preokupá ku derecho di privasia. Esei organisashon di e sektor ICT Waarborg, ta deklará. Ultimo lunanan e organisashon a tene un enkuesta bou di mas ku 700 hóben ku edat di 18 aña bai ariba.

I por último: na Hulanda bo por zundra un polis i yam'é: mierenneuker esta pikidó di pieu. I mierenneuker ta palabra malu na Hulanda. Korte Supremo na Enschede a duna un sospechoso rason. E notisia tin un luga remarkabel den e matutinonan De Telegraaf i AD. Hues a haña e sospechoso kulpabel pasombra el a ofendé un agente polisial. Pero e sospechoso no a haña kastigu. E hòmber a zunda polis pasombra e agente a kita su bòter di serbes for di dje. Pero no ta kastigabel pa uza e palabra mierenneuker segun Korte Supremo. Pero kuerpo polisial di Twente ta atvertí ku esaki no ta motibu pa papia palabra malu ku polis.