Ku e pronóstiko ku eis ta bai dirti wikènt ku ta bin, e chèns ku ta bai bin un Elfstedentocht ta chiki. Pero tòg tur hende na Hulanda ta den gara di e kareda di skats, ku ta pasa den 11 suidat na Friesland. E matutinonan ta yen yen di artíkulo tokante esaki. AD tin asta shete página dediká na e evenementu aki. 'Ansioso pa e kareda' ta titular di Spits. A pesar di e pidanan swak riba ruta di e kareda, e speransa riba un fiesta di Elfsteden ta kresiendo.

Segun De Telegraaf hinter provinsia Friesland ta hasiendo su máksimo esfuerso pa kita tur sneu for di e eis riba ruta di e kareda. Un mayoria grandi den parlamentu ta haña ku alumnonan mester por haña un èkstra dia liber si e kareda di skats tuma luga. Asina AD ta skibi. Skolnan tin mag di sera nan porta e dia ei, pero nan mester duna e oranan di lès un otro biaha si.

Euro por sin Gresia, asina komisario oropeo Neeli Kroes ta bisa den de Volkskrant. Su punto di bista ta kompletamente otro for di e argumentu di paisnan oropeo i Komishon Oropeo. Esta ku mester duna Gresia un fiyansa gigantésko nobo pa evita kaos riba merkadonan finansiero.

"Nada no ta pasa, si un di nos no ta den e zona di euro mas", asina Kroes ta bisa. E ta realisá su mes ku su deklarashonnan ta un tiki kontroversial, pero segun e no ta bèrdat ku e konstrukshon oropeo ta kai den otro si un di e miembronan sali afó. Kroes ta kulpa lidernan di Gresia ku nan no ta di bon boluntat pasobra nan no ke bin ku reformashonnan.

Ta parse ku e gastunan pa kwido den hòspital ta saliendo foi man, asina Trouw ta skibi. Hòspitalnan ta siguí ekspandé i nan ta eksihí asina tantu plaka èkstra ku e gastunan pa kwido di pashènt lo subi probablemente ku 61 euro pa polisa. Asina e kompania di seguro médiko Achmea ta pronostiká. Konsekuensha di esaki ta ku Achmea lo no por sera un kontrato ku kada hòspital. I esaki na su turno ta obliga pashènt bai un otro hòspital.

E kontratonan ku hòspital i otro institutonan di kwido mester ta kla promé ku aprel. Si esaki no logra, Achmea ta bai papia ku dòkternan di kas di manera ku nan por manda nan pashèntnan pa klínikanan ku si tin un kontrato. Pashèntnan ku bai un klínika ku no tin un kontrato ku Achmea, no ta haña nan gastunan pagá.

Koalishon tin miedu ku na 2013 mester tuma medidanan di ekonomisashon temporal drástiko pa por kumpli ku e reglanan oropeo di presupuesto. Esaki nos por lesa den De Telegraaf. Un asina yamá pakete di emergensha por konsistí di oumentu di gastu pa pueblo i kompanianan òf mester vris salarionan di amtenar i pagonan soshal.

Resientemente a diskutí e senarionan di emergensha aki den un grupo chiki den tòp di partidonan di koalishon VVD, CDA i PVV. Riba nivel di amtenar tambe nan ta papiando riba e tópiko aki, segun De Telegraaf. Medidanan drástiko ku ta hasi doló probablemente ta nesesario a korto plaso pa merkadonan finansiero no pèrdè konfiansa. I e konfiansa ei ta importante paso ta dor di esaki Hulanda ta paga hopi tiki interes riba e debe di estado astronómiko.

NRC.next tin awe komo titular 'Suku ta venenu'. E korant ta puntra su mes dikon gobièrnu no ta interveni, pasó suku, anto prinsipalmente fructose ta hopi malu. Hende por bira adikto na suku. E no ta un produkto sano i kada be bo ta haña mas gana di suku. E korant ta skibi mas aleu ku si bo kome suku ku bo ta kima den oranan ku ta sigui, nada no ta pasa. Suku lo no ta diferenshá muchu di alkohòl ni tabako, paso na suku tambe un hende por kustumbra sin ku e por stòp. Mal uzo i adikshon ta djis ei.

Akademia di polis ta buska manera pa hasi studiantenan mentalmente mas kombativo. Asina Nederlands Dagblad ta skibi. E motibu ta e suisidio di polis di trinta aña. El a huza su árma di trabou.

Ayera korantnan a informá tokante un mucha muhé ku a keda pega ku su lenga na un pal'i lus na momentu ku el sunchi e palu mientras tabata vris. Awe nos ta lesa den Spits ku piercings tambe por vris pega na un hende su kara o kurpa. A lo menos, asina un agensia di seguro aleman ta bisa. Piercing den nanishi, lenga o lep por vris pega i okashoná herida serio i doloroso.