E grasia ku presidente Bouterse a duna su yu hòmber di kriansa siman pasá tabata un adelanto riba e grasia ku e ke otorgá su mes. Tur hende na Sürnam ta papia tokante dje esaki segun De Volkskrant. En todo kaso konstitushon no ta stroba Bouterse di duna su mes grasia, si akaso konden'é pa asesinatonan ku a sosodé riba 8 di desèmber 1982. Abogado Gerard Spong ta yama e pordon ku a duna Romano M. un sorto di try-out.

Bouterse no a tene kuenta ku lei na momentu ku el a duna grasia. Pasombra promé e tin ku konsultá ku e hues ku kondená su yu. Pues ora ku e tin ku pidi grasia, e lo por referí riba e proseso ku a uza pa su yu hòmber, segun hurista Hugo Essed. Spong ta mustra sí riba e echo ku un otro gobièrnu lo por hasi e grasia invalido, segun De Volkskrant

Krísis ekonómiko no tin influensia riba e montante neto riba slep di salario di hulandesnan. Mayoria su salario ta bai subi, segun un trahadó di kompania ku ta prosesá slep di salario, esta ADP, den AD. Hulandesnan ku entrada modal kada luna ta sobra mas o menos 13 euro èkstra. Personal di institutonan di kuido su salario tambe ta subi un poko. "E salario no tin di haber ku e forsa di kompra, pasombra preis lo subi", e ADP kompania ta atvertí.

Ta paga hèkernan ku deskrubrí puntonan debil riba e wèpsait di Facebook. Asina por lesa den De Volkskrant. Otro komersiante lo hiba e hèkernan dilanti pero e wèpsait di amigunan a skohe un otro manera pa dil ku e kos: esta plaka. Facebook ta traha ku un tarheta di Visa ku nan ta parti pa e hèkernan. Ora drenta informashon ku algu no ta funshoná bon nan ta pone sèn riba kuenta di tarheta di banko. Kada biaha ta deposita minimal 500 dolar riba e kuenta pero sierto kaso nan a yega di paga mas ku 10 biaha 500 dolar, pues 5000 dolar.

Basta notisia di Sur-Amerika den e rubrika international di De Volkskrant. Segun e matutino kubanonan ta spera ku bishita di papa na fin di mart lo drecha e relashon entre iglesia katóliko i gobièrnu komunista. I presidente Martelly di Haïti ta bai invertí desenas di mion di dolar den inisio di un ehèrsito nashonal. Na 1995 a disolve ehèrsito pa motibu di korupshon. Martelly ke deshasi di e soldánan di Nashonnan Uní den su pais pero esnan ku ta duna sostén internashonal no ta kontentu ku esei.
De Volkskrant ta dedika un historia afondo riba mafia na Bolivia. E kantidat di plantashon di koka ta kresiendo bou di guia di presidente Evo Morales i ekonomia lokal ta kresiendo, danki na invershonnan ku plaka inlegal. E otro banda di e medaya ta ku tin un ola di violensha i likidashon. Awendia e kriminalnan su aparatonan ta mas moderno ku esun di polis i kontrabanda di droga pa Brazil ta sosodé sin ningun estorbo.

Klínikanan na Hulanda ku ta dirigí nan mes riba malesanan venériko e aña aki ta bai selekshoná nan pashèntnan di un manera mas estrikto. Esei ta pará riba portada di Metro. E klínikanan ta kanando asina bon ku nan no por yuda tur pashènt. Nan no por duna konsulta gratis mas. E aña aki lo manda pashèntnan ku ke hasi un test di malesa seksual bèk nan dòkter di kas. I nan lo tin ku duna un bon splikashon dikon nan no ke laga nan dòkter di kas tèst nan. En lo futuro lo duna hóbennan ku no ta kore rísiko di infekshon seksual solamente un tèst di chlamydia.