Naturalmente kaida di gabinete Rutte ta dominá portada di tur maturino djáwe. I tur korant ta puntra nan mes ki dia ta bin elekshon. Promé o despues di zomer? AD ta skibi ku probablemente aki dos luna hulandesnan tin mag di bai urna. E korant a buta un sírkulo rondó di 27 di yüni ku un signo di interogashon. Riba e dia aki tin un wega semi final di Kampionato oropeo i tin un chèns ku Hulanda tin ku hunga e dia aki.

AD ta skibi tambe tokante e deadline di Bruselas, 30 di aprel. E fecha aki poko poko ta bina mas seka i ta kai mei mei di e diskushon tokante e krísis polítiko aktual na Hulanda. Komishon oropeo ta spera aki un siman e plannan di Hulanda kon e tin pensá di dil otro aña ku e problema di defisit presupuestario. Trouw ta pone algun sifra tokante gabinete Rutte riba un rei: 558 dia el a dura. Solamente tres di e otro 27 gabinetenan hulandes despues di Segundo Guera Mundial tabata mas kòrtiku.

De Volkskrant ta informá ku VVD, PvdA i SP ta den un 'winning mood': preferiblemente nan ke pa bin elekshon mas pronto posibel. Huntu nan tin un mayoria chiki. Si tene elekshon dia 27 di yüni esaki lo ta muchu riba man pa partidonan nobo, manera esun di Hero Brinkman ku a bandoná PVV di Geert Wilders. Un partido nobo mester registrá su mes promé komo movimentu polítiko, un proseso ku ta tuma tempu. Segun de Volkskrant CDA tambe ke warda un ratu, pero pa un otro motibu: nan ke skohe un otro lider promé.

E matutinonan tin otro notisia tambe. Union oropeo no ta bai tuma medida kontra Sürnam. Un notisia kòrtiku ku nos ta lesa den de Volkskrant. Hulanda a spera ku e 22 sospechosonan di e asesinatonan di dezèmber 1982 lo a haña prohibishon riba un visum, awor ku parlamentu di Sürnam a aprobá e lei di amnistia. Union oropeo ta keda ' komprometí ku Sürnam' , asina Ashton, komisario oropeo pa asuntunan eksterior a bisa, pero Union oropeo no ta tuma medida si kontra e sospechosonan.

Peru lo ekspulsá Joran van der Sloot probablemente pronto pa Estados Unidos. Kasi tur korant ta hasi menshon di e notisia aki. De Telegraaf ta skibi ku di e manera aki e miedu mas grandi di Joran ta bira realidat. Ta sospechá Van der Sloot di ekstorshon di fami di Natelle Hooloway. E lo a bisa e famianan ku e por bisa unda e kurpa di Natalee ta na Aruba, basta nan pag'é 25 mil dòler. Despues di sinta un eventual kastigu na Estados Unidos, e mester sinta restu di su kastigu na Peru. Ei a sentensi'é na 28 aña kastigu di prizòn pa asesinato di Stepahany Flores.

India, konosí tambe komo Bollywood ta di shòk pa morto di e aktris Meenakshi Thapa di 28 aña. AD ta skibi ku koleganan a sekuestrá e talento ambisioso. Ora a resultá ku su famia no tabatin ranson, esta sèn pa paga pa su libertat, e sekuestradónan a chok'é mata i dekapit'e. Siman pasa a haña kurpa di e aktris i dor di un señal di su selular a lográ detené e sospechosonan. Ahinda no a haña kabes di Thapa.

Tur outo di polis ta bai haña un 'kaha pretu'. Notisia di de Volkskrant. Ku e kaha pretu aki, por rekonstruí un aksidente di minüt pa minüt. Di e manera akí Konseho di Hefenan di Kuerpo Polisial ta spera ku polis ta bai menha nan outo mas mihó i okashoná menos aksidente. Pasó último añanan no a logra redusí e kantidat di aksidente den kual outo di polis ta envolví supstansialmente.

AD ta dediká hopi atenshon na e kaso kontra Maikel R. Aña pasa el a okashoná morto di un porsona ora ku el a kore dal duru den un fila ku fila, ku polis a krea. Polis a krea e fila hustamente pa gara Maikel R. pasó el a kore bai na un pòmp di gasolin despues ku el a kue gasolin sin paga. Riba un pintura den AD nos por mira R. sinta den un ròlstul, su mannan doblá bou di su kachete i su kabei mará den un paardestaart kòrtiku. Segun su abogado e no por kana, pero no ta konosi dikon. E abogado a bisa tambe ku Maikel R. tin hopi duele ku loke a pasa, pero segun AD bo no por ripara masha di esaki si den sala di korte.