Zona di Euro ta krak. Asina de Telegraaf ta skibi awe.  E resultado di elekshon  na Fransia i tambe na Gresia anti Oropa ta pone e union monetario, ku ta den problema kaba, mas bou di preshon. AD ta skibi ku ya kaba 13 gobièrnu mester a baha for di dia ku e krísis di euro a kuminsá. Ta parse ku votadonan ke bisa ku nan ta kansá di tur ekonomisashon.

Trouw ta kere ku kansiyer Merkel di Alemania ta bai keda su so. Merkel ta partidario di medidanan pisá pa ekonomisá. Pero Hollande ke kresementu ekonómiko tambe. Segun e korant Hollande no por pèrmití su mes di bira e persona na Oropa ku ta kontra Merkel, p'esei euro ta muchu vunerabel.

Bouterse ta keda basha zeta riba kandela, asina Trouw ta skibi relashoná ku un presentashon di e presidente di Sürnam djasabra k'a pasa. Bouterse no ta kompronde dikon tin asina tantu tam tam tokante e asesinatonan di dezèmber 1982. 'Nan ta hasi komo sifuera ku ta e 15 mortonan aki ta e únikonan di e desenanan di aña ku a pasa', asina el a bisa. Durante e enkuentro partner di koalishon Ronny Brunswijk a bisa huntu ku Bouterse ku e keda na mando te 2030.

Hulanda ta purba destabilisá Sürnam via di Union oropeo, asina de Volkskrant ta sitá Bouterse. E relashon entre e paisnan a daña por kompleto atrobe, segun e korant. Bouterse a reakshoná riba e notisia ku Union oropeo lo a entamá un prosedura pisa kontra Sürnam relashoná ku e lei di amnistia. "E no ta bai logra nan, tanten ami ta bas", asina e presidente a bisa.

Emansipashon na Hulanda no ta kla ahinda. Asina e direktor saliente di E-Quality Joan Ferrier ta bisa awe den un entrevista grandi den de Telegraaf. E dama Sürnam ku un sentimentu grandi pa hustisia a traha 15 aña na bienestar di hende muhé i hende hómber den komunidat, asina e korant ta skibi.

Tempu ku a  lanta E-Quality hopi hende mester a kustumbrá, Ferrier ta bisa. E organisashon ku ta un fushon di kuater organisashon pa emansipashon, no tabata dirihí su mes riba retrasonan, pero riba e balansa di poder entre hende hómber i hende muhé. Ferrier ta despedí di E-Quality na momentu ku e organisashon ta bai traha huntu ku Aletta, un organisashon pa promoshon di historia di hende muhé. E ta pensando ahinda riba e siguiente paso den su karera.

AD ta revelá e storia tras di e nòmber riba e shirt di futbolista Georgino Wijnaldum di PSV. Despues ku el a hinka un goal ayera kontra Excelsior el a sho un flanè ku e teksto 'Drumi dushi Anthony'. Ta trata di e hóben Anthony Fernandes di 22 aña ku nan a tira mata djabièrnè anochi riba kaya na Rotterdam. Huntu ku Jerson Cabral di Feyenoord nan tabata amigu di infansia.

De Volkskrant ta skibi tokante loke e ta yama un intento pa un golpe di estado na Kòrsou. Kuater miembro di personal di e servisio di seguridat a purba tumba gobièrnu di Gerrit Schotte. Asina promé minister Schotte a anunsiá djabièrnè último. A kibra drenta den e seif di e servisio di seguridat i a hòrta informashon sekreto for di e seif. Segun Schotte a lèk informashon negativo tokante gobièrnu ku e proposito pa deskreditá gobièrnu. Eks promé minister di Antia Maria Liberia Peters ta bai guia e reorganisashon di e servisio di seguridat. Liberia-Peters ta haña sosten di AIVD, e servisio di seguridat di Hulanda.

Trouw ta skibi tokante e asuntu aki. E korant ta enfoká riba e historia di e pleitu entre gobièrnu i e servisio di seguridat ku ta e skrinmentu di promé minister Schotte i algun minister, kendenan tabata un riesgo pa seguridat. Mas aleu e korant ta skibi tokante e pleitu entre Schotte i presidente di Banko di Kòrsou i St. Maarten Emsley Tromp. E korant ta resumí: Gobièrnu di Kòrsou no a logra drecha e mal nòmber ku e tabatin.

Trahadonan ta haña nan retiru mas i mas be pa motibu di kosnan negativo ku nan ta skibi tokante nan doño di trabou via medionan soshal manera Facebook. Asina AD ta skibi. Un trahadó di e kompania Blokker a haña su retiru resientemente pasobra el a skibi riba su Facebook ku su doño di trabou ta un kompania di puta. E retiru aki no ta riba su mes, asina abogadonan di e trahadó ta bisa. Un ofisina di abogado a ripara ku delaster tempu tabatin un kantidat di retiru di trahadonan ku a skibi algu tokante nan doño di trabou riba ínternèt.

Un di e kasonan ta esun di un enfermera ku tabata traha komo asistente den sala di operashon. E tabatin algun luna sintá na kas, sin ta traha. Pero riba  Facebook su koleganan por a miré ta presenta ku su banda. Of e kaso di un empleado ku tabata malu, pero ku a buta potrèt di dje riba su Facebook den zuèmbruk ta disfrutando di un barbeque. Ta pesei tambe AD ta avisá un i tur:  tene kuidou ku kiko bo ta skibi i buta riba ínternèt.