Partido VVD ta bin ku intento nobo pa limitá e kantidat di hóben antiano ku ta bin Hulanda. Awe e partido ta bin ku un proposihon di lei ku ta boga pa eksigenshanan mas severo pa antiano ku ke establese su mes na Hulanda. Asina De Telegraaf ta skibi. Imigrantenan di e islanan mester tin sufisiente medionan finansiero, un bon preparashon i nan mester dominá Hulandes bon. Un detaye hopi remarkabel den e proposishon di lei di VVD ta ku antianonan di menos rekurso no ta bin na remarke pa un pago soshal ni pa un kas di hür supsidiá.

Segun e liberalnan sin e lei ku nan ta proponé próksimo 10 aña 5 mil antiano ta bin Hulanda. E argumentu ku VVd ta duna pa nan proposishon di lei ta segun Stef Blok, presidente di frakshon di e partido den Tweede kamer, ta ku hulandesnan oropeo tambe mester kumpli ku tur sort'i eksigensha pa nan por establese nan mes na un di e islanan. "Hulanda mester tribi di bisa: ta basta awor', asina Blok ta bisa den de Telegraaf. VVD ta bin ku su mes proposishon di lei paso gabinete no ta logra ankrá eksigenshanan mas severo den e lei di konsenso tokante trafikashon di persona.

Entrante otro aña gabinete ta bai aktuá mas severo kontra estranheronan kriminal. Asina De Volkskrant ta skibi. Un estranhero ku haña un kastigu di un dia of mas, den e promé aña ku e ta na Hulanda, ta pèrdè su pèrmit di estadia. Esaki segun plannan di minister Gert Leers di imigrashon, formulá den un lei nobo ku konseho di minister ta diskutí awe.

E lei nobo ta mas severo tambe pa personanan ku ta keda kai den kriminalidat. Por ekspulsa e personanan aki despues di tres be ku nan a kometé un delitu, en bes di ekspulshon despues di dos aña. Un persona ku tin un pèrmit di estadia pa algun tempu kaba, tambe ta kore e riesgo di pèrdè esaki. Ku e medida aki gobièrnu ke duna e señal ku ku komportashon kriminal por perhudiká e states di estadia, segun de Volkskrant.

Entrante otro aña lo kontrolá e lei riba enseñansa avansá mas mihó. Asina De Telegraaf ta skibi. E supervishon riba institutonan pa enseñansa avansá, esta HBO, ta bira mas skèrpi. E institutonan mester bira tambe mas estrikto ku dunamentu di diploma. Un ke otro ta para den un proposishon di lei sekretario di estado Zijlstra. E medidanan aki ta nesesario despues di un aña yen problema i keho tokante enseñansa avansá.

Argentina ta menasa di sera e espasio aereo pa buelonan di Chile pa islanan Falkland, esta Malvinas. Asina De Volkskrant ta informá. Ta trata di e úniko konekshon aereo entre Sur Amerika i e islanan kolonia britániko tantu kwestioná. E blokeo ta un kontesta riba e muestra di poder militar di parti di Gran Britania. E tenshonnan entre Argentina i Gran Britania a subi último simannan. Ta eksaktamente 30 aña pasa ku tabata tin un gera entre e dos paisnan relashoná ku e islanan Malvinas.

Paga debe di estudio bèk ta loteria. De Pers ta habri ku e notisia aki. Pasobra e porsentahe di interes ta stipulá pa sinku aña, sin un bon motibu, eseun èks studiante tin ku paga miles di euro mas tantu ku un otro èks studiante. Pa personanan ku un debe mes haltu di p.e. 60.000 euro, pero ku a kaba di studia den dos diferente aña, e diferensha por subi te 3000 euro den sinku aña di tempu. Segun de pers e kos aki por otro i mas honesto, pero ministerio di enseñansa ta duna di konose ku e no ta bai kambia e aktual sistema.

Si ta na KWF, e fondo pa kombatimentu di kanser, no tin mag di huma ront hulanda. Den Metro e organisashon ta bisa ku mester kibra ku e imáhen tòf ku humamentu tin. Segun KWF humamentu mester ta un kos di pasado. Si hóbennan stòp di bai huma e ora'ei di mes e kantidat di humado ta baha, asina KWF ta kere.

KWF ta kere ku ainda humamnetu ta muchu atraktivo. Ta pesei paki di sigaria mester bira mas karu i mester prohibi humamentu riba riba plenchi di skol. Aworaki ta muchu fasil pa kuminsa ku humamentu, asina KWF ta bisa awe den Metro.

Selekshon di futbòl hulandes definitivamente no por konta ku hungado Douglas di FC Twente durante gampionato oropeo verano binidero. Asina De Telegraaf ta skibi. E brazilero mester a haña dispensashon di FIFA pa e por hunga pa Hulanda, pero e no ta kumpli ku tur eksigensha nesesario. Un hungado naturalisá hulandes mester tin sinku aña bibá na Hulanda i seka Douglas esaki no ta e kaso.