E notisia tokante konklushon di e kumbre Oropeo a drenta muchu lat pa e matutinonan. I ta pesei de Volkskrant, Trouw, NRC Next i Nederlands Dagblad ta dediká tur atenshon na Obamacare. NRC Next a publiká un potrèt riba su portada di e nuebe wesnan ku a tuma e desishon pa aprobá e lei pa seguro médiko general pa tur merikano. Un flecha ta mustra den direkshon di wes supremo Roberts, e wes ku a soru pa un mayoria pa aprobashon di e lei.

Iglesianan protestan na Hulanda konhuntamente mester rekonose na 2013 ku esklabitut a kousa dolo. Asina Age Kramer ta boga pe awe den Nederlands Dagblad. Kramer ta sekretario general di Zeister Zendingsgenootschap di Evangelische Broedergemeente, mihó konosi komo EGB. Awe nan ta presenta un buki ku entrevista den kual miembronan surnameo di EGB ta kontá di nan eksperenshanan ku iglesia protestan i e pasado di esklabitut.

Na Mèksiko tin djadumingu awor elekshon presidenshal. Segun de Volkskrant tantu e kandidato derechista komo esun iskierdista tin hopi chèns pa gana elekshon. AD ta kere ku e kandidato di e partido poderoso bieu PRI Enrique Peña Nieto ta gana elekshon sigur. Echo ta ku e ta para number un den e pronóstikonan. Nieto ke bai dirihí su mes riba China pa minimalisá e dependensha di Estados Unidos. Tur kandidato ta primintí di kombatí korupshon solamente nan no ta bisa kon nan ta bai hasi esaki. De Volkskrant ta skibi ku kandidatonan ta huza e kampaña di elekshon prinsipalmente pa papia malu di otro.

Cynthia Ortega-Martijn ta desmentí ku ta e mes a retirá for di e lista di kandidato di ChristenUnie manera partido a duna di konose anteriormente. "Mi ta disponibel", asina e ta bisa den Nederlands Dagblad. Ortega-Martijn ta enfatisá ku e ta sintié responsabel pa Boneiru, Saba i St. Eustatius i ta pesei tambe e ke siguí ku su trabou den Tweede Kamer. Pero si e no subi e lista di kandidato, un porta ta sera pe, asina e ta konkluí masha trankil. "Pero e or'ei un otro porta ta habri. Esei dios ta indika", e ta añadi.

E asina yamá paisnan BRIC no ta bai salba mundu, asina De Telegraaf ta skibi. E futuro podernan ekonómiko Brazil, Rusia, India i China tambe ta bai haña nan konfrontá ku e krisis ekonómiko ku ta reina na Oropa i ku ahinda tin Estados Unidos den su gara. E balor di e monedanan di e paisnan menshoná ta bahando lihé. No mas ku un aña i mei pasa e situashon tabata nèt kontrali. Invershonistanan ta buskando mas seguridat awor. I a konsekuensha di esaki, sèn ta sali for di e paisnan i kresementu di nan ekonomia ta laga di deseá.

E selular di e mucha muhé Jennefer di 10 aña ku nan a mata aña pasa, ta na Kòrsou i tin hende ta hasiendo mal uso di dje. Ruman muhé di Jennefer a deskubri esaki ora ku resientemente el a manda un mensahe pa e selular i el a risibi kasi mesora un mensahe bèk. Pa ministerio públiko un ke otro no ta motibu pa sospescha un otro hende di asesinaot di Jennefer. Asina AD ta skibi.  E sospechoso prinsipal den e kaso aki ta Anthony, èks di e ruman muhé mayó di Jennefer.