De Volkskrant a reservá hinter su página di eksterior pa e proseso di asesinatonan di dezèmber 1982 na Sürnam. Mayan korte militar ta tuma un desishon riba kontinuashon di e proseso. Segun e korant tin tres posiblidat.
Opshon 1: Ta kontinuá e proseso ku e diskurso di Ministerio Públiko. Segun abogado Gerard Spong esaki ta úniko opshon pasobra e lei di amnistia ta impugná na konstitushon di Sürnam.
Opshon 2: Ta para e proseso pasó lei di amnistia ta stipulá ku mester para tur kaso pendiente kontra e sospechosonan.
i opshon 3: Ta disidí di para e proseso te ora instituuí un korte konstitushonal ku lo mester tuma un desishon e oraei kon tin ku siguí ku e proseso.

Riba tur página di eksterior awe e notisia ku presidente merikano Obama ta pro matrimonio entre hende di mesun sekso. Obama a bisa esaki den entrevista ku ABC News. E ta e prmé presidentemerikano ku ta bisa abuiertamente ku e ta pro matrimonion di homoseksual. Segun Metro e deklarashon di Obama na e momentunan aki, djis promé ku elekshonnan presidenshal ta hopi tenso, paso e ta un tópiko hopi delikado. Un bon ehèmpel di esaki ta e manera ku FOX News a trese e notisia. Un presentado a bisa den transmishon ku ta un 'bon' kos ku Obama a kambia di opinion, mientras riba wèpsait di e emisroa por lesa ku presidente Obama a deklará matrimonio di hende di mesun sekso guera.

Na Hulanda ta estrená e dokumental 'Marley, the definitive story' siman binidero. E ta un dokumental di 2 ora i mei tokante bida di e kantikanan di Bob Marley. De Volkskrant ta skibi ku den e dokumental nan ta dediká hopi atenshon na e talento futbolístiko di e músiko. Su famia tambe ta na palabra. Viuda Rita ta konta ku e mishon di Bob a surpasá nan bida matrimonial. Rita ta pordoná Bob pa tur e biahanan ku el a kòrta su orea. Yu muhé Cedella ta un tiki fada ku nunka e no tabatin su tata pa su mes. I yu hòmber Ziggy a eredá e talento di su tata. El a asta gana un Grammy Award. Tur korant ta masha positivo, e pelíkula ta haña 4 o 5 strea.

Otro siman eksámennan di HAVO i VWO ta kuminsa. I esaki no ta trese strès solamente pa e alumnonan, sinó pa dosentenan tambe. Den Trouw nos por lesa ku segun e kas editorial pa buki di skol, e dosentenan ta sinti nan mes responsabel pa kada fout ku e alumnonan hasi durante e eksámen. Un regla nobo ta bisa ku un alumno hulandes ta haña su diploma solamente si e tin un promedio 5,5 o mas pa tur materia di eksámen. I e regla aki ta okashoná hopi strès.

Un storia un poko pekuliar riba e portada di de Telegraaf. Un hende muhé di 84 aña di Nijverdal a sa di kore ku un ladron femenino. Bayendo kas despues ku el a kaba di kumpra kos na un supermerkado, e ladron muhé a kué tené na su schouder. E atrakador kera kita su kadena di oro for di su garganta. Pero e machi a sa di kita e muhé for di su kurpa i kore kuné.  Ora el a yega su kas seif, el a ripará ku e tabatin un di dos kadena di oro na su garganta.