Desapunto total den e matutinonan hulandes. 'Kareda no ta sigui. Frisnan, danki pa e gran aporte!', ta titular ku lèter diki k'a sali awé riba portada di De Telegraaf. Huntu ku e artíkulo por mira potrèt grandi djun bòrchi riba èis na Balk, un pueblesitu na Friesland. Rib'e bòrchi a pone un aviso. Tin skibí ku mester paga tinu p'e èis, pasó e ta masha peligroso mes. E imáhen ei ta splika di biá kon bin Elfstedentocht, e kareda magno di skats, no por sigui mas: e èis no ta sufisientemente diki.

Riba portada di Metro tambe por mira un potrèt grandi di èis den naturalesa anto riba dje e palabranan 'nos a hera..' E korant ta kere ku Hulanda ta sigui k'e speransa djun kareda di skats e aña akí, ma ku e kentura di Elfstedentocht a baha poko.

Tabata tres dia fantástiko, ta konklushon di De Pers. E korant akí ta skibi ku e hendenan di Friesland tabata kasi mes histériko ku e makambanan ku e solo idea djun posibel Elfstedentocht. Frisnan ta hendenan sensato, konosí pa nan sentido komún, pero último dianan no a ripará mashá djesei, pa no bisa nada ètòl, asina De Pers ta komentá. Es mas: nan a instalá e tarima di homenahe dia bieu.

E korantnan a kubri otro tipo di notisia tambe. Karnaval di Brazil a bira víktima djun wèlga di polis n'e pais, asina Algemeen Dagblad ta informá. Selebrashon di karnaval na Brazil ta menasá di para bira kaos total, awor ku polis a buta trabou abou. Nan ta protestá pa oumento di suèldu i pa mió sirkunstansha laboral.

A mobilisá ehérsito na Salvador, e di tres siudat mas grandi di Brazil. E kantidat di asesinato a subi enormemente n'e siudat, despues ku polis a kanta wèlga. Anto figurábu, nèt den un temporada ku miles di turista ta baha bai Salvador pa selebrá karnaval. E otro siudatnan brazilero tambe ta sumamente prekupá ku e protestanan den temporada di karnaval, anto no di polis so. Mañan brantwer i wardadónan di prizòn tambe ta drenta wèlga na Rio de Janeiro.

De Volkskrant sa di informá ku hunta di komisario di Ajax ta baha boluntariamente. "Ku tur seguridat esei lo sosodé awe mes", asina un fuente bon informá dje korant a bisa. Retiru dje hunta no ta un sorpresa. Djamars korte na Amsterdam a prohibí nombramentu di Louis van Gaal komo direktor.

Na novèmber presidente Ten Have i su koleganan Römer, Davids i Olfers a aserká Van Gaal i a nombr'é provisoriamente, sin ku Johan Cruijff, e di sinku komisario, tabata na latura djesei. A sigui un krísis direktivo anto si hunta no a baha boluntariamente, e akshonistanan lo a vota mañan djabièrnè pa kore ku e komisarionan.

Ni sikiera kuater porshento dje direktornan di organisashonnan sosial na Den Haag ta alóktono, asina ta pará den Trouw. Pues apenas e organisashonnan aki ta refleho di nan siudat, asina investigashon di partido PvdA ta demostrá. Na skolnan básiko, kasi 5 porshento dje direktornan di alóktono. Situashon di skolnan superior ta relativamente bon ku 7 porshento.

Sero porshento dje funshonarionan haltu na skolnan sekundario ta alóktono, siendo ku mas ku mitar dje poblashon di Den Haag ta konsistí di hulandesnan di desendensha strañero. 'Nos no por haña nan, òf....nan no tin e kompetenshanan ku nos ta buska', ta argumentonan ku por tende hopi be. Jeltje van Nieuwenhoven, presidente di frakshon di PvdA, ta kompará e kos akí ku e di dos ola feminista di añanan 70. "Tabata menshoná e tipo di argumentonan ei tambe e tempu ei, kaba no tabata bèrdat", asina el a bisa Trouw.

De Volkskrant a portretá Jean-Julien Rojer, e tenista nasé na Kòrsou ku ta debutá den selekshon pa Davis Cup. Entretantu el a kustumbrá ku remarkenan chistoso mané 'Paga tinu ku bo pòtmòni'. Su koleganan di tim ta gab'é mashá, e no ta un Federer, pero e ta inspirá hende sí. Robin Haase, ku tambe ta den selekshon di tènes, ta denominá Rojer komo un berdadero spesialista di dòbel partido.

Lo dun'é un kurso di urgensha di idioma i kultura hulandes, pa e pora kanta himno di Wilhelmus durante seremonia di apertura di kampeonato pa Davis Cup di mañan djabièrnè. Rojer a splika De Volkskrant trankil asina ku e no tabata konosé himno di Antia tampoko.