Instruktornan di polis hulandes ku a trein un tim surnameo di aresto speshal na 2007, tabata prepará riba un atentadó di kómplesenan di Desi Bouterse. Asina e periodista speshalisá den krímen John van den Heuvel ta skibi awe riba portada di de Telegraaf. E instruktornan hulandes a siña nan koleganan surnameo e téknikanan mas moderno pa detené sospechosonan peligroso. Esaki a sosodé den sekresia riba petishon di gobièrnu di Sürnam di e temp'ei.

Minister di hustisia di e temp'ei Santokhi tabata ke pa e tim arestá Desi Bouterse relashoná ku e asesinatonan di dezèmber 1982. Derepente e servisio di informashon i seguridat hulandes a atvertí e instruktornan hulandes pa akshonnan di vengansa di Bouterse. Ta pesei e polisnan hulandes a disidí di kana armá 24 ora pa dia.

E storia a lèk pasó un di e miembronan di e tim mester a responsabilsá su mes dilanti wes pasó e tabata kana ku su arma pafó di oranan di trabou. Segun e polis aki, ta su koleganan surnameo a konsehé hasi esaki. Na final no a detené Bouterse pasó segun gobièrnu di Sürnam esaki tabata un riesgo grandi.

Gobièrnu hulandes mester stòp di huza e terminologianan outóktono, alóktono oksidental i alóktono no oksidental. Registronan sivil di munisipionan mester registrá solamente e pais di nasementu di un migrante i no e pais kaminda su mayornan a nansé. De Volkskrant ta skibi tokante e konseho akí ku Raad voor Maatschappelijke Ontwikkeling ta manda awé pa gabinete demisionario di Mark Rutte.

E órgano di konseho ta haña ku desendensha di un persona no ta importante, pero su futuro. Kemen ta inesesario pa registrá suidadanonan a base di nan etnisidat. Ademas registrashon a base di etnisidat tin diferente inkonvinensia. A introdusí e tipo di registrashon aki pa kombatí retraso seka e diferente gruponan di minoria étniko na Hulanda. Pero awendia ta huzé mas bien pa stipulá maneho di seguridat. I segun e órgano di konseho no tin un base legal pa registrá imigrante a base di desendensha étniko.

No ta tur hende ta diakuerdo ku e opinion di e órgano di konseho. E profèsernan Han Entzinger i Jean Tillie ta haña ku ta tira yu ku awa afó. Pasó di e manera aki hopi konosimentu tokante komunidat multikultural ta bai pèrdi. E promé hefe di kuerpo di polis alóktono Martin Sitalsin ta hustamentu kontentu ku e no ta un alóktono mas. E ta haña ku e terminologia aki ta ekskluí hende. Pero e ta hopi orguyoso si di su identidat surnameo. "Mi ta yama mi mes un hulandes di desendensha sürnam hindustan", asina e ta bisa den de Volkskrant.

Den tur korant tambe hopi atenshon pa e debate entre e seis kandidatonan pa kabes di lista di CDA. E debate a tuma luga ayera'nochi na Rotterdam. AD ta duna e kandidatonan un seifer di rapòrt. Marcel Wintels ta esun di mas malu, e ta haña un 5. Segun e korant e no tin nada remarkabel, ounke e ta bisa ku e ke inspirá hende. Sybrand van Haersma Buma i Mona Keijzer tur dos ta haña un 8. Buma pasó e ta sigur di su mes i tambe hopi relax. Keijzer pasó e sa kon pa hala atenshon i kon pa retá e otro kandidatonan.