Resumen di korant

Riba promé página di De Telegraaf i AD tin atenshon pa e atrakadónan di e hoyero di Den Haag Trattman ku siman pasá nan a tira mata den su hoyeria. Un di e atrakadónan, Sandro Grigolia di 19 aña , a arestá den su pais natal Georgia. Riba promé página di De Telegraaf por mira su potrèt. E mucha hòmber tin un t-shirt blou bistí i polis ta bai kuné.

Durante su aresto el a hasi un konfeshon kompleto, ayera polis a mustra e imágennan. “Mi tabatin problema finansiero”. Sandro ta konta “Rib’un dia mi amigu i ami a disidí di atraká e hoyeria. E doño a resistí, mi a haña miedu i sin mi por a yuda mi a tira dos be.”

AD a habri atake riba Jeugdzorg na Hulanda. E korant a haña papel den man kaminda ta sali ku e mucha hòmbernan ta bou di supervishon di diferente instansha añanan kaba. Kontinuamente nan ta stet skol i tin problema ku outoridat. Esun ku a tira for di su 14 aña tabatin kontakto ku hustisia pa motibu di poseshon ilegal di arma. Direktor Hans Beelen ta bisa den e korant: Nos a hasi loke nos por. Bo ke progresá pero tin be bo ta kontentu si un situashon keda mas o ménos stabil. E ta boga pa subi edat di guia pa 23 aña. Awó Jeugdzorg ta stòp na 18 aña.

Awe 4 di mei ta konmemorá víktimanan di segundo guera mundial. Den De Volkskrant e historia di èks direktor di skol Johan van Hulst, e tin 101 aña kaba i den guera a skapa sentenar di mucha hudiu. E tabata smòkel hiba nan adrès di skonde. Un dia un aleman a bin wak i el a mira ku ainda tabatin hopi mucha hudiu, i el a grita ku manisé lo bin buska nan. E dia ei Van Hulst a avisá tur hende i manda e muchanan un lugá seif. No opstante su aktonan heroiko Van Hulst no ta haña su mes un héroe. Nos a skapa mas ku 500 mucha pero ménos ku mil. Mi a hasi loke mi por pero no ta hopi.

E volkan Popocapetl na Méhiko ketu bai no ta trankil. Despues di un serie di eksploshon a resultá un nubia di shinishi di un dos kilometer di haltura. Segun AD e shinishi a yega siudat di Méhiko kaba, 60 kilometer mas leu. Habitantenan ta prepará pa un posibel evakuashon.

Un aña pasá, riba promé di mei, trupanan merikano a tira Osama Bin Laden mata. AD tin un rekonstrukshon di e dia, for di presidente Obama su war room, un kamber kaminda masha poko hende por a wak via kámara chikí. Kasi niun hende no tabata na altura di e operashon Geronimo, e nòmber di kódigo di e terorista di Al Qaeda.
Presidente Obama ta konta ku mitar di su staf no tabata tin un idea ta kiko ta pasando. Ni su kasá Michelle no tabata sa di nada, ta via televishon el a haña sa. Presidente a bis’é ku e tin ku traha ainda. Hillary Clinten , minister di asuntunan eksterior, tabata presente pero su kasa, Bill Clinton, tampoko no tabata sa di nada.

Michael Jackson ta bai hasi kasi tres aña morto, pero remarkabel ta ku atrobe e ta kara di Pepsi Cola. Spits ta skibi ku e marka di limonada ayera a traha un dil ku famianan di The King of Pop. Nan por usa su kara i e piesa Bad. No ta promé be ku por mira Michael den propaganda di Pepsi. Na 1984 tambe el a bria den un di nan propagandanan. Durante e grabashon su kabei a pega kandela i e leshonnan a keda molesti’é largu tempu. Segun ekspertonan di entertainment ta e remedinan di pasa doló ku el a tuma e tempu ei tabata komienso di su adikshon na remedi ku na final a kaba kuné.

Si bo purba gana bo falta di soño bèk pa medio di drumi mas largu den wikènt no ta prudente si bo ke baha peso. Asina De Telegraaf ta skibi. Segun un promovendus di Universidat di Groningen falta di soño ta kousa oumentu di glukose den sanger i esaki por kousa diabétis i sobrepeso. Alkansá soño bek e ora ei no tin sentido pasobra bo ta bira mas gordo, segun e korant.