Riba portada di De Telegraaf ta pará ku Boneiru ta den gara djun kaso grandi di violashon seksual anto ku posiblemente un òfisir haltu di mareshosei ta involukrá. Diesdos dia pasá un señora a denunsiá e teniente, ma ainda no a detené. E kos akí lo a lanta masha rabia den seno di polis n'e isla hulandes karibense. Debí na gravedat dje kaso, polis a pidi asistensha di reshèrshi na Hulanda, spesialisá riba terenu di krimen kontra moral. De Telegraaf ta informá ku e investigashon ta kanando ainda.

Presidente di Konseho hulandes pa Hurisdikshon, e órgano atministrativo mas haltu di wes, ke pa en lo futuro laga públiko sigui kasonan hudishal na televishon i riba enternèt. Den Algemeen Dagblad a sali ku wesnan tin pensá pa lanta un emisora di televishon apart pa e kos akí. E idea ta pa graba prosesonan grandi ku kámara, esta esnan pa krimennan notorio ku a spanta komunidat. Asina akí siudadanonan ta hañ'un mió bista den trabou di wes. Ademas nan por komprondé mió tambe kon i pakiko wes ta dikta sierto sentensia i kastigu.

De Volkskrant ta informá ku parlamentu di Uruguay a disidí di legalisá abòrtes. No ta kos ku a disidí asina asina sí, a tene un debate basta emoshonal ku a dura 14 ora. Finalmente a aprobá e lei banda banda ku 49 voto kontra i 50 pro. De Volkskrant ta kere ku ta un desishon pionero tòg n'un kontinente kaminda abòrtes ta un tabú masha grandi mes anto kaminda miones hende muhé pa aña ta rekurí na klínikanan ilegal pa yuda nan. Si senado tambe disidí di aseptá e lei, e or'ei muhénan na Uruguay tin mag di interumpí nan embaraso te 12 siman despues di konsepshon.

METRO a asistí n'e bolsa funerario ku a tene ayera na Gorinchem pa eksposishon di pakete fúnebre alternativo. E korant gratuito a deskubrí lo último den e gremio. Ta trata di un despedida bèrdè. A mustra piedra di graf ku por resiklá, potowela o sea urna ku por desintegrá biológikamente i tambe kaha ekolóhiko. Un komersiante ta bende ka'i morto trahá di palu resiklá anto e ta uza kubrekama òf comforter bieu pa fura nan. “Pakiko kap palu, traha kaha, pa despues tin ku hink'é den fòrnu un par di ora despues?” asina e komersiante ta puntra. E artefaktonan bèrdè ta popular, sobretodo serka hubentut.

Andre Rieu, violinista hulandes virtuoso, a keda nominá pa Lunas-award, e premio musikal mas prestigioso di Méhiko. E nominashon a drenta p'e rei di wals, mané sa yam'é na Hulanda, despues djun serie di konsierto bon bishitá na Latinoamérika. Pa ser eksakto, tur biá karchi a kaba! Aña pasá el a bende kasi 70.000 karchi pa konsierto di músika klásiko.

E éksito akí na Suramérika a sorprendé Rieu basta sí. Ta djis un gira e di e ta bai hasi, pa despues karchi a bende mané pan kayente. Na Méhiko e ta mashá famoso debí na benta di CD ilegal. Dia 31 di òktober ta entregá e galardon di Lunas-award. De Telegraaf ta bisa ku Placido Domingo ta e rival mas grandi di André Rieu.