Fernando Lugo, e presidente ku nan a baha na Paraguay, a forma un asina yamá 'gabinete den sombra'. Dje forma akí e ta start un ofensiva kontra su susesor Federico Franco, ku a inougurá ayera n'e pais suramerikano. De Volkskrant ta kere ku Lugo ke reasumí presidensha di Paraguay lihé.

Ma den Trouw por lesa ku pueblo paraguayano no ta mira nesesidat di su regreso n'e puesto ei. Ta e gobièrnunan dje demas paisnan latinoamerikanu ta indigná ku e bendita gòlpi parlamentario ku Lugo ta papia di dje. De Volkskrant kièr sa ku Lugo tabata kasi pèrdí kaba komo hende djafó; su koalishon a nase morto, na mod'i papia, segun dosente di sekshon di estudionan pa Latinoamérika na London School of Economics.

Algemeen Dagblad ta informá k'a kue 162 kilo di kokaína na Kòrsou. Wardakosta a bai haña e lote di narkótika den tres skuter akuátiko. A detené e tres sospechosonan. Mester a lòs tiru di atvertensha pa para esun ku kier a kore bai.

E karta di despensa ku Joran van der Sloot ta spera di risibí redukshon di kastigu kuné, apénas ta notisia awé p'e korantnan. Ta De Telegraaf so a dun'é basta kobertura, pero mester bòltu blachi bai te página 8 sí. E karta a lèk via abogado di Van der Sloot, asina e matutino ta skibi. Joran ta bisa ku e tabata fuma i k'e tabatin problemanan síkiko. Otro luna e kaso di apelashon enkuanto asesinato di Stephany Flores ta bai dilanti na Peru. Si por konvensé tribunal ku e krimen no tabata premeditá, o sea ku Van der Sloot no tabatin intenshon di mata e damita peruano, anto e or'ei su kastigu di prizòn por baha k'un par di aña.

Joanne Kellerman, direktor di De Nederlandsche Bank, o sea banko sentral di Hulanda a kòmbersá ku Algemeen Dagblad. E ta rekomendá hulandesnan pa spar sèn mas tantu posibel òf pa kab'i paga nan hipoteka pasó añanan ku ta bin lo no bai ta nada fásil den sentido finansiero: penshunnan lo baha, prèis di benta di kas tambe anto mientras tantu gastunan médiko ta subiendo. Ta p'esei e ta konsehá hende pa studia nan situashon finansiero fe djawó, sobretodo ku mira riba e periodo despues ku baha ku penshun.

Mas i mas mucha ta keda sin blo na skol djis promé ku fakansi kuminsá. Ta pasó nan mayornan i famia a disidí di adelantá nan vakashon, asina METRO a habri awé. Aña pasá e kantidat di mucha ku ta falta skol pa 'motibunan di luho' a subi ku 10 porshento kompará k'e aña anterior, segun sifranan di ministerio di Enseñansa hulandes, ku ke informá mayornan mió di e loke lei di enseñansa obligatorio ta enserá. Mayornan ta risk'un but si nan tene yu na kas sin un motibu na drechi den temporada eskolar. E ministerio ta uza media sosial pa baha e kantidat di kaso di mucha ku ta stet skol, pasó nan mayornan ke bai ku fakansi fe tempran.

De Telegraaf ta kere ku aw'i bebe ta na peliger, pasó purifikashon di awa ta birando mas i mas karu na Hulanda. Loke ta pone ku aki poko tempu aw'i kranchi ta bira kasi impagabel. P'e motibu akí e órgano kordinadó di kompania ku ta prosesá awa ke pa protehá lugá kaminda ta pòmp saka awa mió. Tur esaki pasobra mas i mas empresa di industria di konstrukshon, zeta i gas ke bora i koba bou di suela na Hulanda.

Algun persona prominente den komunidat hulandes a hasi aña awé. Prensès Alexia por ehèmpel, e di dos yu muhé di prens heredero Willem-Alexander i prinsesa Maxima. Henk van der Meijden, 'tata di periodismo farandulero', manera ta yam'é den De Telegraaf, tambe ta di fiesta awé, el a kumpli 75 aña di edat. Tur hende ku a yega di lesa Story ku Privé i e artíkulonan farandulero den De Telegraaf, mester konosé nòmber di Henk van der Meijden.

E korant a dun'é homenahe ku un potrèt i un bukèt di flor riba su portada. De Telegraaf a puntr'é kiko ta sekretu di su karisma hubenil na edat grandi? Traha duru anto un esposa yòn band'i dje, asina Van der Meijden a kontestá e matutino hulandes.