Kobertura total dje debate parlamentario djayera na Hulanda den korant djawe. Promé minister Rutte i e presidentenan di frakshon den Tweede Kamer a elaborá riba kaída di gabinete hulandes. Mester buska un salida pa e krísis finansiero í pa esun polítiko.

Kos ku lo no bai djun manera próspero, esei por nota bon kla, lesando titular dje matutinonan hulandes. De Volkskrant: "E forma di ataká krísis ta sples gremio polítiko"; Titular di Trouw no ta pa kanta makamba tampoko: "Impase total pa kuent'i ekonomisashon". Mañan lo papia mas detayá den Tweede Kamer di e medidanan di ousteridat, ku tin ku ahustá défisit presupuestario p'e baha bira 3 porshento òf ménos, manera a palabrá den Union oropeo.

Fila di CDA ke pa e minister demishonario di Finansa komo kabesante di lista, asina ta pará den Algemeen Dagblad. Kopartidarionan lo ku preshoná Jan Kees de Jager pa enkabesá lista di CDA tòg na okashon dje próksimo elekshon parlamentario, programá pa sèptèmber. De Jager ta bisa ku e 'no ta amibishoná nada den e direkshon ei'. Hopi miembro di partido no tin intenshon di resigná ku e rechaso ei, segun Algemeen Dagblad.

Aña pasá e kantidat di hóben interná na hòspital, intoksiká ku alkohòl, a bolbe subi, asina De Volkskrant ta informá. E sifranan a bin di Nederlands Signaleringscentrum voor Kindergeneeskunde. E sentro akí ta registrá i aktualisá kuantu persona menor di edat, ku ta bebe te kai den koma, ta bai para anualmente na sekshon di promé asistensha.

Na 2011, dòkternan di mucha a notifiká 762 kaso, ku ta 12 porshento mas ku e aña anterior. Fuera djesei e muchanan ku a bebe pasa límite tabata mas yòn i nan a keda mas tempu den koma ku'n promedio di tres ora i mèi.

Esun k'a kere ku e dosnan no ta anda bon ku otro, aparentemente  ta mal kibuká. Louis van Gaal a duna Johan Cruijff pabien den Algemeen Dagblad i De Telegraaf ku su 65 aniversario. Den un aviso ku a yena henter un página, Van Gaal a buta lo siguiente: "E echo ku ami t'esun ku ta felisitá Johan Cruijff no ta di mes. Nos tabatin i tin hopi diferensha di opinion ainda, ma nos tin hopi kos komun ku otro tambe: e amor pa Ajax, Barcelona i hunga bala pa gana".

Den Trouw por lesa un diskushon filosófiko rib'e pregunta, si por husga komportashon di antes k'e normanan di awendia. Awendia ta repudiá asuntunan ku un tempu tabata tolerá. Ma kon ta hasi husga aktonan kontrovershal di pasado antó, e korant ta puntra. Sklabitut tambe ta bin dilanti. E filósofo i e istoriadó ku ta hiba e diskushon den Trouw ta kere ku tur dos por. Por konsiderá ku norma i balor ta mará na un sierto époka, pero tambe komo prinsipionan eternamente válido.

Hulanda ta un di e 12 paisnan mas seif na mundu, asina Algemeen Dagblad ta informá. Chèns djun atentado terorista no ta signifikativamente grandi. Apesar dje krísis ekonomíko, no por papia di disturbio grandi òf wèlga na gran eskala, ku ta desareglá Hulanda.

Algemeen Dagblad ta basa su informashon riba un lista nobo di klasifikashon djun konsehero di riesgo. For di 2010, e peliger di atentado i violensha polítiko a baha na Hulanda. For di e momento ei e pais a sak di 'riesgo oumentá' pa riesgo 'limitá'.

Polítika na Hulanda ta den un impase serio, asina ta pará den Trouw. E korant ta kere ku e siman akí frakshonnan den Tweede Kamer lo no logra formulá un pakete di medida di ousteridat, ku ta kumpli ku kondishonnan di Union oropeo. E debate djayera den Kamer tokante kaída di gabinete Rutte a eksponé un divishon grandi den parlamentu hulandes, segun Trouw.

E korant ta kere ta algo úniko ku ta bati kabes ku otro den un debate públiko pa solushoná e forma di ataká défisit presupuestario. Esnan envolví k'e asuntu den sírkulonan di gobièrnu ta duda mashá si fin dje luna akí mes por manda Bruselas un plan uniforme. Asta e punto di salida, esta un défisit di no mas ku 3 porshento na 2013, ta trese divishon.

De Volkskrant ta skibi di labor di mucha. E kasnan di moda hulandes C&A i Primark ta kumpra pañ'i bisti serk'un empresa na Zùit-India. Ta mucha ta kose e pañanan ei, asina ta pará den un rapòrt djun ofisina di investigashon i dje grupo di trabou nashonal pa asuntunan di India.

Te dia djawe ta fòrsa mucha muhé traha ofertaim na fábrika grandi na India. Hopi be nan ta biba riba terenu dje fábrika i kasi nunka nan no tin mag di bandoná e terenu. C&A i Primark ta kleim ku nunka nan no a haña indikashon di trabou di mucha. C&A ta kere ku e mes lo tin di investigá e asuntu na India.